اسلام آباد۔ 19جون (اے پی پی): پارلیمانی سیکرٹری برائے انسانی حق صبا صادق ءَ امریکی صدر ڈونلڈ ٹرمپ ءُ فیلڈ مارشل سید عاصم منیر ءِ گند ءُ نند ءَ را سک باز ارزشتی ءُ جوان لیک اتگ ءُ گشتگ کہ اللہ تعالیٰ ءَ فیلڈ مارشل سید عاصم منیر ءُ پاکستان ءَ را مزنیں شرپ ءِ داتگ۔ اللہ تعالیٰ ءِ رحمت ءَ پد سرجمیں دگنیا مئے سروکی ءُ پاک فوج ءِ کرد ءَ گوں مزن احترام ءُ شرپ ءَ چارگ ءَ انت ۔ پاک فوج ءَ بھارتی زوراکی ءِ ھلاپ ءَ فیلڈ مارشل عاصم منیر ءِ سروکی ءَ وتی کرد ءِ پیلو کنگ ءُ مزن وزیر ءَ موثر سفارتکاری ءِ راہ ءُ رھبند سرجمیں دگنیا ءَ گپ ءُ تران کنگ بوھگ ءَ اِنت۔ ھاسیں رنگ ءَ گوستگیں روچ ءَ وائٹ ھاوس ءَ فیلڈ مارشل سید عاصم منیر ءُ امریکہ ءِ صدر ڈونلڈ ٹرمپ ءِ گند ءُ نند سک باز ھاسیں بوتگ، پاکستان ءُ مئے فورسز ءِ عزت ءُ شرپ مزن بوتگ، اے مئے درستانی واستہ فخر ءِ گپ انت۔ پنچ شمبے ءِ روچ ءَ اے پی پی ءَ گوں ھاسیں تران کنان ءَ آئی ءَ گوشت کہ گوستگیں بھارتی زوراکی ءِ پسو ءَ فیلڈ مارشل سید عاصم منیر ءِ زانتکاریں حکمت عملی ءِ سبب ءَ دژمن ءِ نا شریں ارادہ ناکام بوتگ اَنت، پاکستان ءُ پاکستانی لشکر ءِ حوصلہ ءِ تہ ءَ گیشی بوتگ ءُ دمگ ءَ بھارت ءِ ٹکر ٹکر بوھگ ءِ دعویٰ مزنیں طاقت بوتگ۔ اے درستیں مزن وزیر شہباز شریف ءُ فیلڈ مارشل عاصم منیر ءِ سروکی ءَ حکومت ءِ موثریں حکمت عملی ءُ زانتکاریں پیسلہ آنی آسر انت۔ غزہ ءِ ھوالگ ءَ جست ءِ پسو ءَ آئی ءَ گوشت کہ سرجمیں مسلمان ءُ غیر مسلم ریاست غزہ ءَ برجاھیں ظلم ءُ زوراکی آنی ھلاپ ءَ زھرشانی کنگ ءَ اَنت ۔ اسرائیل ناشرکاریں ریاستے ءُ نیتن یاہو ناشرکارانی سروک اِنت کہ آ اقوام متحدہ ءِ قرارداداں بے ھیال کنان ءَ وانگجاہ، نادراھجاہ ءُ پناہ گاہانی سر ءَ اُرش کنگ ءَ اَنت کہ ایشی ءِ آسر ءَ مئے مات ءُ پت، برات، پیر ءُ زھگ ناحق ءَ شھید کنگ بوھگ ءَ اَنت۔ او آئی سی ءُ غیر سرکاری گلاں ہوار میاں اوستمانی براتی ءَ را یکجاہ بوھگی انت ءُ اسرائیل ءِ بربریت ءَ را گر ءُ دار کنگی انت۔ گوستگیں روچاں اسلام آباد ءَ دو جنک آنی کوش ءِ ھوالگ ءَ آئی ءَ گوشت کہ مزن وزیر ءَ ہدایت کتگ کہ اے وئیل آنی تہ ءَ ھواریں مردم آناں گوں سکیں رنگ ءَ کار کنگ بہ بیت ءُُ اے درگت ءَ اسلام آباد پولیس ءُُ ایجنسی اے کیس ءِ سر ءَ کار کنگ ءَ اَنت۔ ایمان کوش کیس ءِ ملزم پولیس ءِ دست ءَ انت ءُ آئی ءِ حلاف ءَ گیشیں پٹ ءُ پول کنگ بوھگ ءَ انت ۔ آئی ءَ گوشت کہ اے کیس ءِ ھوالگ ءَ آمید گس ءِ کارروائی ءَ مھکمیں دلیل دیگ بنت تانکہ مجرم انصاف ءِ دیم ءَ آرگ بہ بیت۔ آئی ءَ گوشت کہ ثنا یوسف بہ بیت یا ایمان، منی ھیال ءَ آیوکیں وھد ءَ اے وڑیں وئیل مہ بنت، من ایشی ءِ سر ءَ کار کنگ ءَ آں کہ ایشی ءِ گر ءُ دار بہ بیت۔ آئی ءَ گوشت کہ پرائیویٹ زالبولانی ھاسٹل آنی ھوالگ ءَ ایس او پی جوڑ کنگ بوھگ ءَ انت تانکہ اے جنک آناں سیکورٹی ءِ واستہ سرجمیں بندوبست بہ بیت، اودا انچیں منظمیں نظام بہ بیت کہ انتظامیہ ءُ حکومت یکجائی ءَ ایشی ءِ چار ءُُ تپاس ءَ بہ کن انت تانکہ اے وڑیں دل ٹُکّوکیں وئیل پدا ہچ پرائیویٹ ہاسٹل ءَ مہ بیت۔ بجٹ ءِ ھوالگ ءَ آئی ءَ گوشت کہ بجٹ ءِ تہ ءَ الس ءَ را ریلیف پجارینگ ءِ واستہ کوشست کنگ بوتگ ءُ الس ءِ بنیاتی لوٹ آناں جان سلامتی ءُ وانگ ءُ زانگ ءِ آسراتی ءَ ھوار الس ءِ بنیاتی لوٹ آناں ھیال ءَ دارگ ءَ بجٹ ایر کنگ بوتگ.
