واشنگٹن ۔19جون (اے پی پی):امریکی صدر ڈونلڈ ٹرمپ ءَ پاک اُرد ءِ سروک فیلڈ مارشل عاصم منیر ءِ سرکاری گس وائٹ ہاؤس ءَ آئی ءِ شرپ ءَ نان ءِ مراگش ءِ میزبانی کت ءُ گوشت کہ پاک اُرد ءِ سروک ءَ گوں گند ءُ نند منی واستہ شرپ ءِ گپ اِنت۔ گند ءُ نند ءَ دوئیں راہشوناں اسرائیل ءُ ایران ءِ جیڈھاں ھوار بازیں بنگپانی سرا حیال ءُ لیکہ درشان کتگ ۔ گند ءُ نند ءَ پد مدکیہ ءِ جُست ءِ پسو ءَ صدر ڈونلڈ ٹرمپ ءَ گْوشتگ کہ پاکستان (فیلڈ مارشل عاصم منیر) ایران ءَ سک شری ءَ زانت، سک شری ءَ زانت ءُ آ اسرائیل ءُ ایران ءِ جیڑھ ءَ چہ وش نہ اِنت۔ اے گپ نہ اِنت کہ آئی ءِ سیادی گوں اسرائیل ءَ شر اَنت، درحقیقت آ دوئیں چیزاں زانت بلے بوت کنت کہ آ ایران ءَ شرتر زانت ءُ آ جاوراں چارگ ءَ اِنت ءُ آ (فیلڈ مارشل عاصم منیر) منی گپ ءَ منّ اِیت۔ امریکہ ءَ آئی ءَ را اد ءَ دعوت دیگ ءِ سبب ایش ات کہ من آئی ءِ منت ءَ گرگ لوٹ ات کہ آئی ءَ جنگے (گوں ہندوستان ءَ) ءَ چہ رکّ اِت ءُ جنگ ھلاس بوت۔ امریکی صدر ءَ ایشی ءِ کریڈٹ بھارتی مزن وزیر نریندر مودی ءَ را ھم داتگ۔ آئی ءَ گوشت کہ ایشی ءِ سبب است انت کہ فیلڈ مارشل عاصم منیر ءَ گوں گند ءُ نند منی واستہ شرف انت۔ زانگ بہ بیت کہ فیلڈ مارشل عاصم منیر پاکستان ءِ اولی چیف آف آرمی اسٹاف اِنت کہ آئی ءِ میزبانی ءَ امریکی صدر ءَ وائٹ ہاؤس ءَ کتگ ایشی ءَ چہ پاکستان ءِ گوما وتی سیادی ءَ را دیمروئی دیگ ءِ واستہ امریکہ ءِ واھشت ءِ پدر کنگ بیت۔
