اسلام آباد۔18جون (اے پی پی): مزن وزیر محمد شہباز شریف ءَ گوشت کہ ایران ءُ اسرائیل ءِ جنگ ءَ چہ پیداکیں جاور ھال دمگی ءُ جھان ءِ امن ءِ واستہ سک پریشان کنوک ءُ سک خطرناک انت۔ پاکستان ءَ ایران ءِ سرا اسرائیل ءِ زوراکی ءَ را سک مذمت کتگ۔ ایران ءُ اسرائیل ءِ میان ءَ جنگ بندی ءِ واستہ میان استمانی براتی زوتیں رنگ ءَ کرد پیلو بہ کنت۔ اللہ تعالیٰ مارا گوں ہندوستان ءَ جنگ ءَ مزنیں سوب مندی دات۔ بلاول بھٹو زرداری ءِ سروکی ءَ پاکستانی ڈل ءَ امریکہ، یورپ ءُ اے دگہ ملک آنی تہ ءَ پاکستان ءِ موقف سرجمی ءَ پیش کتگ۔ ادارگ سیکورٹی ءِ لوٹ پیلو کنگ بنت ۔ بجٹ ءَ پی ایس ڈی پی ءِ واستہ یک ہزار ارب کلدار ایر کنگ بوتگ، پگار 10درسد گیش کنگ بوتگ، ما آئی ایم ایف ءَ را گشتگ ات کہ ما کشت ءُ کشاری ءِ سرا ہچ وڑیں ٹیکس ءِ اجازت نہ دئیں۔ چار شمبے ءِ روچ ءَ وفاقی کابینہ ءِ دیوان ءَ گوں گشتانک دیان ءَ مزن وزیر ءَ گوشت کہ ایران ءُ اسرائیل ءِ نیام ءَ جنگ ءِ سبب ءَ جاور ھال سک پریشان کنوک ءُ دلپروش انت۔ اسرائیل ءَ مئے ھمساھگیں براتیں ملک ایران ءِ سر ءَ پدریں رنگے ءَ اُرش کتگ کہ ایشی ءِ تہ ءَ سداں مردم شھید بوتگ ءُ سداں ٹپی بوتگ اَنت۔ من، نائب مزن وزیر ءُ درئی کارانی کارگس ءَ اے زوراکی ءَ سک مذمت کتگ۔ میاں اوستمانی براتی ءَ پہ جنگ بندی ءَ سرجمی ءَ کوشست کنگی اِنت۔ مزن وزیر ءَ گوشت کہ منی گوں ایران ءِ صدر مسعود پیشمرگا ءَ ھم اے ھوالگ ءَ سرجمیں ٹیلی فون ءَ گپ ءُ تران بوتگ۔ من ترکی ءِ صدر رجب طیب اردوان ءَ گوں ھم گپ ءُ تران کتگ۔ ایران ءِ صدر ءِ گوما وتی گپ ءُ تران ءَ من پاکستان ءِ الس ءِ نیمگ ءَ ایران ءَ گوں سرجمیں یکوئی ءِ درشانی کت۔ ھاوند زوت ءَ چہ زوت امن ءُ ایمنی ءِ جاہ ءَ بہ دنت پرچا کہ اے جنگ نہ ایوک ءَ دمگ ءِ ھاترا بلکیں جھان ءِ امن ءِ ھاترا ھم سکیں ھترناک اِنت۔ مزن وزیر ءَ گوشت کہ غزہ ءِ جاور ھال ھم سک پریشان کنوک ءُ دلپروش انت، 50 ھزار ءَ چہ گیش زھگ، پیر، زالبول، ورنا، ڈاکٹر ءُ انجینئر شھید کنگ بیتگ انت، غزہ ءَ ظلم ءُ بربریت بوھگ ءَ انت، دگنیا ءِ ضمیر کدی بیدار بیت ۔ آئی ءَ گوشت کہ نائب مزن وزیر ءُ دری کارانی وزیر 21 ءُ 22 ءَ ترکی ءَ روگ ءَ انت تانکہ او آئی سی ءِ دری کارانی وزیر آنی دیوان ءَ بھر زوری کنگ بہ بیت، من ترکی ءِ صدر رجب طیب اردوان ءَ گوں ھم گپ ءُ تران کتگ، آئی ءِ کوشست ءُ آئی ءِ موقف ھم سک باز پدّر انت۔ وفاقی بجٹ ءِ ھوالگ ءَ مزن وزیر ءَ گوشت کہ وفاقی بجٹ پیش کنگ بوتگ، وزیر ءِ ھزانگ، سیکرٹری ھزانگ، چیئرمین ایف بی آر ءُ آھانی ٹیم ءَ مزنیں محنت کتگ، بجٹ ءِ سر ءَ اتحادی گل آناں ھم اعتماد کنگ بوتگ، اے وھد ءَ پارلیمنٹ ءَ بجٹ ءِ سر ءَ گپ ءُ تران بوھگ ءَ انت۔ مزن وزیر ءَ گوشت کہ ما آئی ایم ایف ءَ را گوشتگ ات کہ کشت ءُ کشاری ءِ سر ءَ ٹیکس نہ بیت نہ کھاد ءِ سر ءَ ءُ نہ کہ کیڑے کشیں درمان آنی سر ءَ۔ آئی ایم ایف ءَ مئے بیان من اِتگ کہ ایشی ءِ ھاتر ءَ آ منت وار اَنت۔ زراعت ءِ شعبہ پیسر ءَ چہ دباؤ ءِ تہا انت۔ ما اے پیسلہ ءَ پہ آئی ءِ دیمروی ءَ کنگی ات۔ چہ 12لکھ ءِ آمدنی ءِ سر ءَ ایوک ءَ یک درسد ٹیکس زورگ بیت کہ گوستگیں سال ءَ 5 درسد بوتگ۔ بجٹ ءِ تہ ءَ پگار آنی تہ ءَ 10درسد گیشی کنگ بوتگ ۔ مزن وزیر ءَ گوشت کہ اللہ تعالیٰ ءَ مارا بھارت ءِ گوما جنگ ءَ مزنیں سوب مندی داتگ۔ اللہ تعالیٰ ءِ فضل ءُ کرم ءُ پاکستانی سلاہ بندیں اُرد ءِ جوانیں کارکردگی ءُ 240ملین مردمانی بے دروریں مہر ءُ کمک ءَ ما اے جنگ ءَ سوبمندی رست۔ ما ناشرکاری ءِ ھلاپ ءَ جنگ ءِ واستہ ھم جزم آں ۔ ایشی ءِ واستہ بجٹ ءِ تہ ءَ پاکستانی سلاہ بندیں اُرد ءِ المی ئیں سامان پجارینگ ءِ واستہ مالی توان گیش کنگ بوتگ پرچا کہ اے وھد ءِ لوٹ اِنت۔ مزن وزیر ءَ گوشت کہ پی ایس ڈی پی ءِ کساس ھم یک ھزار ارب کلدار ایر کنگ بوتگ۔ ما چیلنجانی باوجود یک معاہدے کتگ ءُ آئی ءَ را پیلو کنگی انت۔ ما ھما مردمانی تہ ءَ ھوار نہ ایں کہ آیاں وتی وعدہ لگ اِت اَنت ءُ ملک ءِ معیشت ءَ دیوالیہ ءِ نزیک ءَ آورت اَنت۔ شکر انت کہ ما نہ ایوک ءَ 2023 ءَ ملک ءَ چہ ورشکستگی ءَ رکّینتگ بلکیں مرچی ملک دیمروئی کنگ ءَ اِنت۔ مزن وزیر ءَ گوشت کہ بلاول بھٹو زرداری ءِ سروکی ءَ ڈل ملک ءِ لیکہ ءِ پیش کنگ ءِ واستہ درملک ءَ شتگ۔ ڈل ءَ پاکستان ءِ نمائندگی ءَ بازیں ملکاں کتگ ءُ امریکہ، یورپ ءُ اے دگہ ملکانی تر ءُ تاب کتگ۔ بلاول بھٹو زرداری ءُ ڈل ءِ درستیں باسک درملک ءَ پاکستان ءِ مھکمیں رنگ ءَ نمائندگی کنگ ءِ ھاتر ءَ ڈل ءِ درستیں باسک آنی کوشست آنی ستا ءَ کن اَنت۔
