اسلام آباد۔17جون (اے پی پی):مزن وزیر محمد شہباز شریف ءَ گوں صدر آصف علی زرداری ءَ گند ءُ نند کتگ۔ صدر ءِ مملکت ءِ پریس ونگ ءِ نیمگ ءَ جاڑی بوتگیں بیان ءِ رد ءَ دیوان ءَ ملک ءِ استیں سیاسی ءُ معاشی جاور ھال آنی سر ءَ ھیال ریچی کنگ بوت۔ گند ءُ نند ءِ تہ ءَ نائب مزن وزیر محمد اسحاق دار، منصوبگ بندی، دیمروئی ءُ ھاسیں گامگیج آنی وفاقی وزیر احسن اقبال، کانود ءُ انصاف ءِ وفاقی وزیر سینیٹر اعظم نظیر ترار ءُ سینیٹر سلیم مندوی والا ھم ھوار اتنت۔ مزن وزیر ءَ صدر ءِ مملکت ءَ را متحدہ عرب امارات ءِ گوستگیں سرکاری تر ءُ تاب ءُ وفاقی بجٹ ءِ بابت ءَ سرپد کت۔ اے موہ ءِ سر ءَ صدر ءِ مملکت ءَ گوشت کہ وفاقی بجٹ ءَ لس مردم ءِ وشھالی ھاسیں رنگ ءَ مزدور ءُ کم آمدنی ءِ تبک ءَ را اولی رنگ دیگ بہ بیت۔ آئی ءَ گوشت کہ تنخواہ دار، پنشنرز، مزدور ءُ پد منتگیں تبک آنی جیڈھ آنی گیواری ءِ واستہ بجٹ ءَ جوانیں گامگیج آنی ضلورت اِنت۔ صدر ءِ مملکت ءَ گوشت کہ روزگار ءِ موہ پیداک کنگ ءُ گریب ءُ نزوریں تبک آنی کمک ءِ واستہ چاگردی سلامتی ءِ سکیم آناں دیمروئی دیگ ءِ ضلورت اِنت۔
