اسلام آباد۔17جون (اے پی پی):صدر آصف علی زرداری ءَ اسلام آباد ءَ ایئر ہیڈ کوارٹر ءِ تر ءُ تاب کتگ ءُ پاک فضائیہ ءِ سروک ایئر چیف مارشل ظہیر احمد بابر سدھو ءَ گوں گند ءُ نند کتگ۔ سئے شمبے ءِ روچ ءَ صدر ءِ مملکت ءِ کارگس ءِ پریس ونگ ءِ نیمگ ءَ جاڑی بوتگیں بیان ءِ رد ءَ صدر ءِ مملکت ءَ پاکستان ءِ بالی اُرد ءِ افسر ءُ مرد آناں پاکستان ءِ بالی سیم سر آنی رکھینگ ءِ تہ ءَ وتی دراجیں سوبمندی ءُ بھارتی زوراکی ءِ ھلاپ ءَ فیصلہ کنوکیں پسو ءِ واستہ دلبڈی دیگ ءِ واستہ تر ءُ تاب کتگ۔ صدر ءِ مملکت ءِ سر بوھگ ءِ سر ءَ پاک فضائیہ ءِ جوانیں لیسیں دستہ ءَ آئی ءَ را گارڈ آف آنر دات۔ گند ءُ نند ءِ ساھت ءَ ایئر چیف مارشل زہیر احمد بابر سدھو ءَ صدر ءِ مملکت ءَ را پاک فضائیہ ءِ آیوکیں جنگ آنی درگت ءَ آپریشنل سٹرٹیجی، فورس ءِ ڈھانچہ، مول ءُ مراد ءُ جاری منصوبگ آنی بابت ءَ سرجمیں بریفنگ دات۔ صدر ءِ مملکت ءَ را گوشگ بوت کہ بھارت ءِ گوما گوستگیں کش ءُ چیل ءِ وھد ءَ پاک فضائیہ ءِ سوبمندی مزن تربیت، مُدامی آپریشنل تیاری ءُ وت مہ وتی دیمروئی کتگیں نوکیں جنگی صلاحیت آنی آسر بوتگ۔ وتی راجدپتر ءِ تہ ءَ اولی رند ءَ پاک فضائیہ ءَ سرجمیں سپیکٹرم آپریشن کتگ، ایشی ءِ تہ ءَ خلاء، سائبر ءُ الیکٹرانک جنگ یکجا کنگ بوتگ۔ بریفنگ ءِ تہ ءَ گیش گوشت کہ نوکیں ءُ انقلابی ٹیکنالوجی آنی اسٹریٹجک کارمردی ءَ پاکستان ءِ سوبمندی ءِ تہ ءَ مزنیں کردے پیلو کتگ۔ صدر ءِ مملکت ءَ پاک فضائیہ ءِ افسر ءُ مردین آنی پیشہ وارانہ ، بے دروریں جزم ءُ جزبگ ءَ را شگر ءُ منت درشان کت۔ آئی ءَ گوستگیں جیڈھ ءِ وھد ءَ پاکستان ءِ وت واجہی ءُ سیمسر آنی رکھینگ ءَ پاک فضائیہ ءِ فیصلہ کنوکیں کرد ءَ را ساڑات۔ صدر ءِ مملکت ءَ ایئر چیف مارشل زہیر احمد بابر سدھو ءِ سروکی ءَ را ساڑات ءُ گوشت کہ ایئر چیف ءِ کوھینیں سروکی ءَ پاک فضائیہ ءَ را نوکیں ٹیکنالوجی ءَ چہ لیس کتگ۔ صدر آصف علی زرداری ءَ گوشت کہ ایر چیف ءِ سروکی ءَ پاک بالی اُرد ءِ آپریشنل تیاری ءَ را مزنیں کساسے ءَ گیشی بوتگ ءُ پڑ ءَ طاقت ءِ توازن ءَ را دوبر ردوم دیگ بوتگ۔ صدر ءِ مملکت ءَ گوشت کہ پاک سلاہ بندیں اُرد ءِ مھکمیں ءُ رھشونی ءَ ھندی زوراکی ءِ وھد ءِ سر ءَ پد مھکمیں پسو دات، ءُ پاک فضائیہ ٹیکنیکل ءُ اسٹریٹجک شوبگ ءَ دیم ءَ بوتگ۔ صدر ءِ مملکت ءَ پاک فضائیہ ءِ جنگی تیاری ءِ سر ءَ دل یکیمی ءِ درشان کت ءُ حکومت ءِ نیمگ ءَ چہ پاک فضائیہ ءَ ھمک رنگ ءِ کمک ءِ دل یکیمی دات۔ ایشی ءَ پد صدر ءِ مملکت ءَ نیشنل آئی ایس آر ءُ انٹیگریٹڈ ایئر آپریشن سینٹر ءِ ھم تر ءُ تاب کت۔ صدر ءِ مملکت ءَ را پاک فضائیہ ءِ سرجمیں آپریشنل صلاحیت آنی ھوالگ ءَ ھم سرپد کنگ بوت۔
