اسلام آباد۔17جون (اے پی پی): راجی اسمبلی ءِ اسپیکر سردار ایاز صادق ءَ پارلیمنٹ گس ءَ ازبکستان ءِ سفیر علی شیر تختیف ءَ گوں گند ءُ نند کتگ، ایشی ءِ تہ ءَ دو نیمگی سیادی، دمگی جاور ءُ وت مہ وتی مفاد ءِ جیڈھ آنی سر ءَ ھیال ریچی کنگ بوتگ۔ اسپیکر ءَ گشتانک دیان ءَ گوشت کہ پاکستان ءُ ازبکستان مذہب ءُ دود ءُ ربیدگ ءِ ابدمانیں سیادی ءَ گوں بندوک انت، پاکستان ازبکستان ءِ گوما وتی براتی ءُ دوستی ءِ سیادی ءَ را سک باز ارزشت دنت۔ اسپیکر راجی اسمبلی ءَ دوئیں براتیں ملک آنی پارلیمنٹ آنی نیام ءَ رابطہ آناں دیمروئی دیگ ءِ ضلورت ءِ سر ءَ زور پر دات ءُ گوشت کہ پارلیمانی رابطہ دوئیں ملک آنی اُلس ءَ را یک دومی ءِ گوما نزیک کنگ ءَ کمک رسیت۔ پاکستان دو نیمگی پارلیمانی ءُ اقتصادی سیادی ءَ را گیش مھکم کنگ ءِ واھشت مند اِنت، راجی اسمبلی ءَ جوڑ بوتگیں پاک ازبک پارلیمانی دوستی گروپ پارلیمانی رابطہ آنی دیمروئی ءِ تہ ءَ سرگرمیں کرد پیلو کنگ ءَ اِنت۔ دوئیں ملک آنی تہ ءَ تجارتی ءُ اقتصادی شوبگ آنی تہ ءَ کمک ءِ دیمروئی ءِ واستہ مزنیں موہ است انت، پاکستان خطہ ءَ امن ءُ برجائی ءِ واھشت مند انت۔ ازبک سفیر علی شیر تختائیف ءَ پاک ازبک پارلیمانی سیادی ءَ را دیمروئی دیگ ءِ واستہ راجی اسمبلی ءِ اسپیکر ءِ کرد ءَ را ساڑات ءُ گوشت کہ پاکستان ءِ مزن وزیر محمد شہباز شریف ءِ ازبکستان ءِ گوستگیں تر ءُ تاب یک ھاسیں سنگ میل ءِ ثابت بیت۔ پاکستان دمگ ءِ ھاسیں ملک انت۔ پاکستان ءِ سیاسی سروکی ءِ دمگ ءِ دیمروئی ءُ وشھالی ءِ واستہ بے مٹیں عزم ستا کرز انت۔ دوئیں براتیں ملک آنی نیام ءَ تجارت ءُ ایندگر اقتصادی شوبگ آنی تہ ءَ کمک ءِ واستہ مزنیں امکانات است انت۔ ازبکستان ءِ سفیر ءَ راجی اسمبلی ءِ اسپیکر سردار ایاز صادق ءَ پارلیمانی ڈل ءِ گوما ازبکستان ءِ سرکاری تر ءُ تاب ءِ دعوت دات۔
