اسلام آباد۔ 17جون (اے پی پی) بنجائی وزیر حوالکاری و شینکاری عطاء اللہ تارڑ پارینے کہ آجوئی صحافت جمہوری نظام نا روح ءِ ، پیکا کانود مستند صحافی تے رکھ فراوان کیک، ساڑی آ پاک بھارت بے چیٹی ٹی میڈیا قومی سلامتی و ریاستی موقف نا رکھ اٹ پامداری نا درشانی ءِ کرے ہراستاکڑزک، جرنلسٹس پروٹیکشن کمیشن زوت کاریم نا بناءِ کیک، باقاعدگی اٹ شینک مفروک اخبار آتیکن کمیٹی اس جوڑ کننگانے۔ داہیت ءِ او سے شنبے نادے آداڑے کونسل آف پاکستان نیوز پیپرز ایڈیٹرز(سی پی این ای) نا صدر کاظم خان نا کماشی ٹی اوڑدہی کن بروک سی پی این ای نا ڈل اتون گپ وتران کرساپارے۔ داوخت آ زیراعظم نا میڈیا کوآرڈی نیٹر بدر شہباز وڑائچ وپرنسپل انفارمیشن آفیسر مبشرحسن ئسک ہم ساڑی ئسر۔ اوڑدہی ٹی پیکاایکٹ، باقاعدگی اٹ شینک مفروک آ نیوز پیپرآتا چٹفنگ، پرنٹ میڈیا ءِ ادائیگی، جرنلسٹس پروٹیکشن کمیشن تون اوار ایلو اہم امور تیا گپ وتران مس۔ ڈل اتون گپ وتران کرسا بنجائی وزیر حوالکاری عطاء اللہ تارڑ پارے کہ پیکاکانود مستند صحافی تے رکھ فراوان کیک ۔ پیکا ایکٹ نا اصل مسخت صحافت نا لویس اٹی اودیم پن انا و جعلی صحافی تے کانود نا دنگ اٹ اتنگ ءِ۔ اوپارے کہ سلابت و پین گچینی آ یخین تخیوہ۔ پیکاکانود آ صحافتی تنظیم آتون سلابت کن تیاراُن۔ رولز انا بارواٹی سلاہ تا خیرمقدم ءِ کننگک۔ بنجائی وزیر پارے کہ پیکاکانود نا بابت صحافی و تعلقدار وزارت آتا نیام اٹ غلط گمانی تے مرکننگک۔ اوپارے کہ باقاعدگی اٹ شینک مفروک آ اخبار تا چٹفنگ کن کمیٹی اس جوڑ کننگانے۔ اوپارے کہ پرنٹ میڈیا ءِ داسال سلوک آ پیسہ غاتا مد اٹی ادائیگی کننگک۔ عطاء اللہ تارڑ پارے کہ جرنلسٹس پروٹیکشن کمیشن زوت کاریم نا بناءِ کیک ۔ بنجائی وزیر حوالکاری ساڑی آ پاک بھارت بے چیٹی ٹی قومی مفاد اٹی میڈیا نا کڑد انا ستاءِ کرسا پارے کہ میڈیا قومی سلامتی ریاستی موقف نا رکھ اٹ پامداری نا درشانی ءِ کرے۔ اوپارے کہ پاکستانی میڈیا سہی معلومداری تا فراوانی و ہوکا تا بیخ کنی ٹی زموارانہ کڑد ادا کرے و مشکل حالیت آتیٹی قومی یکجہتی نا کلہو تس ہرا ستاکڑزک۔ اوپارے کہ آجوئی صحافت جمہوری نظام نا روح ءِ و حکومت صحافی تا رکھ ، راجی آسودہی و کسبی آسراتی کن گچین گام گیج کننگ ءِ۔ اونا پاننگ ئس کہ میڈیا ریاست نا چارمیکو تمبہ ءِ و حکومت خواہک کہ میڈیا ءِ مون تروک چیلنج آتا ادارہ جاتی ایسری اس کشنگے۔ سی پی این ای نا ڈل وزارت حوالکاری و شینکاری و پاک فوج انا شعبہ تعلقات عامہ (آئی ایس پی آر) نا کنڈآن وخت آ و پک معلومداری تا فراوانی آ اوفتا گچین کڑد انا ستاءِ کرے۔ ڈل پارے کہ وزارت حوالکاری معلومداری تا وخت آ و پک فراوانی ءِ پک کرسا حوالکاری نا روانی ءِ گچین ومربوط تخاہرا ستاکڑزک۔ سی پی این نا ڈل صحافی تا رکھ، معلومداری اسکان رسینگ و صحافت نا کسبی چاگڑد نا گچینی نا بابت سلاہ پیش کرے۔ بنجائی وزیر حوالکاری ڈل انا سلاہ تیا سنجیدگی اٹ سجفنگ نا باوری کرفے۔ اوپارے کہ صحافی تا ویل آتا ایسری کن ہرممکن کمک فراوان کینہ، میڈیا نمائندہ غاتون اسیجائی ورکنگ گروپ ٹہیفسا مون تروک ویل آتے اولیتی بنداو تیا ایسر کینہ۔
