اسلام آباد ۔ 17 جون (اے پی پی) بنجائی وزیر واپار جام کمال خان تون السی جمہوریہ چین نا سفیر جیانگ زائیڈونگ سے شنبے نادے آ داڑے خیرسگالی اوڑدہی کرے و پاکستان نا ساڑی آ زرگزرانی اصلاحات و پالیسی گام گیج آتا ستاءِ کرے۔ جاری بیان نارداٹ چینی سفیر تون اوار بڑزکو کہولی ڈل ہم ئس ہراٹی منسٹرز قونصلر زیانگ گوانگیوان و شوہانگتیان ، سکینڈ سیکرٹری وانگ چُن، تھرڈ سیکرٹری ژانگ ڈٹووو اتاشی لیولیزہن ، یانگ ڈاپینگ و وانگ جِنگ جیوئسک ہم اوار ئسر۔ اوڑدہی ٹی ہڑتوم آ فریق آک تین پہ تینی واپار و زرکاری نا مون آدننگ آ فائدہ ئی و تعمیری گپ وتران کریر۔ داوخت آپاکستان و چین نا نیام اٹ ساڑی اقتصادی تعلقداری تا جاچ ءِ ہلنگا و کمکاری ءِ پین سوگو کننگ نا گمان تیا گپ وتران کننگا، خاص وڑاٹ مون آ بروک بشخ آتیٹی کمکاری ءِ مون آ دننگ آ زور شاغنگا۔ ہڑتوم آملک آک داعزم انا درشانی ءِ کریر کہ او تین پہ تینی اقتصادی انضمام ءِ پین زیات کیرہ ، پائیدار واپاری وڑوڈول آتے مون آدیرہ، و گڑا، خذمت و مہارت آتا ہل و تس ءِ آسان کیرہ ۔ اوڑدہی ٹی داہیت آامنا کننگاکہ غٹ کہول آتیا خڑکی رابطہ و باقاعدہ ہل وتس ءِ برجاتخنگک تانکہ برجاگام گیج آتیا گچین عملدرآمد ءِ پک و کمکاری نا پوسکن ءُ وارخواہی پٹنگ مرے۔ اوڑدہی اسہ اسیجائی وژن ایسر مس ہراٹی ہڑتوم آ ملک آتا جوان شونداری، علاقائی رابطہ و مریس مدی شونہالی ءِ مون آ دننگ آامنا کننگا۔ اوڑدہی ٹی چینی سفیر حکومت ءِ پاکستان نا ساڑی آ زرگزرانی اصلاحات و پالیسی گام گیج آتا ستاءِ کرے۔ اوپاکستان نا سوگو زرگزرانی بحالی نا ہم ستاءِ کرے۔ اوپاکستان نا زرگزران ءِ سوگوی و پائیدار شونداری نا کسر آ دننگ آ وزیراعظم محمد شہباز شریف نا سرکڑدہ ئی نا ہم ستاءِ کرے۔
