اسلام آباد۔ 17جون (اے پی پی) وزیراعظم محمد شہباز شریف پارینے کہ پاکستان ریلویز ملکی زرگزران و مواصلات اٹی تمبہ نا حیثیت تخک، دا ہن و بر نا اڑزان ، ترند و چاگڑد دوست ذریعہ ءِ، ریکوڈک ءِ ریلوائی نیٹ ورک تون گنڈنگ آن بلوچستان نا مائنز اینڈ منرلز نا بشخ انا شونداری و علاقہ نا الس کن روزگار نا پوسکن وارخواہی ودی مریک۔ پی ایم آفس نا میڈیا ونگ آن جاری بیان نا رداٹ وزیراعظم محمد شہباز شریف داخیال آتا درشانی ءِ تینا کماشی ٹی پاکستان ریلویز نا اپ گریڈیشن و اونا ریکوڈک اسکان ودکی نا بابت سے شنبے نادے آ مروک آ بڑزکو کہول نا دیوان آن تران اٹی کرے۔ دیوان اٹی آخبت نا کارگو و ہن و بر نا گرج آتا رداٹ پاکستان ریلویز نا شونداری بشمول ایم ایل۔ون ایم ایل۔3 نا اپ گریڈیشن نا بارواٹی حوال تننگا۔ وزیراعظم 2028اسکان ریکوڈک ءِ ریلوائی لائن نیٹ ورک تون گنڈنگ نا پارت کرے۔ اوریلوائی نا اپ گریڈیشن و شونداری کن فائنانسنگ نا بابت بین الوزارتی کمیٹی اس جوڑ کننگ نا پارت کرسا پارے کہ کمیٹی پاکستان ریلویز نا شونداری و اونا ریکوڈک اسکان ودکی کن درکار فائنانسنگ نا بابت پبی سلاہ پیش کیک۔ وزیراعظم پارے کہ پاکستان ریلویز ملکی زرگزران و مواصلات اٹی تمبہ نا حیثیت تخک، ریلویز ہن وبرنااسہ اڑزان، ترند و چاگڑد دوست ءُ ذریعہ اسے، ریکوڈک ءِ ریلوائی نیٹ ورک تون گنڈنگ آن بلوچستان نامائنز اینڈ منرلز بشخ انا شونداری مریک و علاقہ نا الس کن روزگار نا پوسکن وارخواہی ودی مریک۔ دیوان اٹی نائب وزیراعظم و وزیرخارجہ محمد اسحاق ڈار، وزیردفاع خواجہ محمد آصف ، وزیراقتصادی امور احدخان چیمہ ، وزیر بحری امور جنید انور چوہدری، وزیر ریلویز حنیف عباسی، وزیرمملکت ریلویز بلال اظہرکیانی، خصوصی کمکار طارق فاطمی و بڑزکو سرکاری کمامدارآک شریک ئسر۔
