اسلام آباد۔ 17 جون (اے پی پی) بنجائی وزیر خزانہ و محصولات سینیٹر محمد اورنگزیب پارینے کہ پنجرجاتی اصلاحات آ پائیدار بنداو تیا عملدرآمد کننگ انگ ءِ، امریکی ٹیرف نا بابت پاکستان مسابقتی مارکیٹ ءِ، بجٹ اٹی پنشن کن فنڈ آتا کچ اسہ ٹریلین روپئی آن گدرینگانے ہراشونداری بجٹ آن زیات ءُ ۔ سے شنبے نادے آ سیکورٹیز اینڈ ایکسچینج کمیشن آف پاکستان نا کنڈآن اڈ ہلوک دود آن تران کرسا وزیرخزانہ پارے کہ ڈیہہ اٹی بے چیٹی نا حالیت و داملک آ اونا گمانی زرگزرانی اثرآتا بابت گام گیج کننگ انگ ءِ، تدوک آدے دا بابت غٹ شریدار آتون ننا فائدہ ئی گپ وتران مسنے، دانا مسخت توانائی نا معقول کوڑی و اوفتا نہاد آتا چاروکی ءِ پک کننگ ءِ۔ حکومت حالیت آتون مون تننگ کن تیار ءِ، ننے اومیت ءِ کہ حالیت آتیٹی گچینی بریک۔ وزیرخزانہ پارے کہ تدوک آ نن اونا امریکی وزیر واپار تون جوان گپ وتران مسنے، ہڑتوم آ ملک آک سہی سمت اٹی گام گیج کننگ ءُ، امریکی ٹیرف نا بابت پاکستان اسہ مسابقتی مارکیٹ اسے، ہڑتوم آملک آک تزویراتی شریدار ءُ ۔ وزیرخزانہ پارے کہ پنجرجاتی اصلاحات آ پائیدار بنداو تیا عملدرآمد کننگک، خراج، ایس اوایز و توانائی تون اوار قومی زرگزران نا اہم بشخ آتیٹی اصلاحات نا عمل برجاسلک، سرکاری خڑچ آتیٹی کمتی ووام تا منظم انتظام و انصرام کن ہم گام گیج کننگ انگ ءِ، پنشن تون اوار ایلو بشخ آتیٹی اصلاحات نا عمل برجاءِ وننے اودے مون آ دروئی ءِ۔ اوپارے کہ بجٹ اٹی پنشن کن فنڈ آتا کچ اسہ ٹریلین روپئی آن گدرینگانے، ہرا شونداری بجٹ آن زیات ءُ، ننے ایلو بشخ آتیکن وسیلہ غاتا فراوانی ءِ پک کننگ نا ءِ، بجٹ اٹی 10 ملین روپئی آن زیات پنشن آ 5 درسد خراج نا سلاہ تننگانے۔ اوپارے کہ پبلک پرائیویٹ پارٹنر شپ و پنشن کنٹری بیوشن نا بابت بالترتیب سندھ و خیبرپختونخوا نا آزموندہ غاتیان فائدہ ہرفنگے۔ وزیرخزانہ پارے کہ ٹیرف اصلاحات بنداوی بدلی ءُ، داڑآن گڑاس صنعت آک زہمی تو مریرہ ہراڑکن وزیراعظم کمیٹی اس جوڑ کرینے ہراٹی غٹ تعلقدار شریدار اوار ءُ، کمیٹی بدلی تا عمل اٹ کمک فراوان کیک۔
