راولپنڈی۔ 17 جون (اے پی پی) چیف آف آرمی اسٹاف فیلڈ مارشل سید عاصم منیر امریکہ نا سرکاری دورہ غاٹی ءِ۔ دورہ ٹی اوواشنگٹن ڈی سی ٹی اوورسیز پاکستانی کمیونٹی تون گپ وتران کرے۔ چیف آف آرمی اسٹاف تون اوڑدہی کن بھلو کچ اسے ٹی مچ مروک آ سمندر پار پاکستانی تا کنڈآن اودے جم وجوش اٹ بخیرکننگا۔ سے شنبے نادے آ آئی ایس پی آر آن جاری بیان نا رداٹ پردیسیک آپریشن بنیان مرصوص/معرکہ حق اٹی سلہہ بند فوج انا شاندار کارکڑد نا ستاءِ کریر ہراٹی او بہادری و کسبی مہارت نا درشانی ءِ کریر۔ گپ وتران اٹی آرمی چیف پیشن نا ملک رہینگوک آ پاکستانی تا کنڈآن پاکستان نا سفیر مننگ نا ناطہ اہم کڑد ا اوفتا پبی ستاءِ کرے۔ اوزرراہی تس ، زرکاری و ایلو بشخ آتیٹی بڑزکو سرسہبی تا کمک اٹ فعال کڑد ادا کرسا پاکستان نا زرگزران و جہانی ساکھ اٹ اوفتا شراکت نا اعتراف ءِ کرے۔ سمندر پار پاکستانیک آرمی چیف اتون تینا آزموندہ و سلاہ تے شیئر کریر۔ اواسیجائی چیلنج آتون مون تننگ و کمکاری ءِ مون آ دننگ کن پدریسہ کمکاری نا گرج ءِ تالان کرسا سمندر پار پاکستانی تتون رابطہ غاتا اہمیت آزور شاغار۔ فیلڈمارشل سید عاصم منیر و سمندر پارپاکستانیک اسہ زیات رکھ ، شونہال و لچکدار پاکستان کن اواری اٹ کاریم کننگ نا قول کریر۔
