اسلام آباد۔ 17جون (اے پی پی) ترندی اٹ بدل مروک علاقائی حالیت و دے ٹک نیامی ٹی بے چیٹی ٹی بھلا ودکی خاص وڑاٹ ایران نا برخلاف اسرائیل نا برجا فوجی جارحیت نا رداٹ الجزائر ، بحرین، برونائی دارالسلام ، چاڈ ، کوموروس، جبوتی، مصر، عراق، اردن ، کویت، لیبیا، موریطانیہ، پاکستان، قطر ، سعودی عرب، صومالیہ، سوڈان ، ترکیہ، اومان و متحدہ عرب امارات نا وزراء خارجہ غاک اسہ اسیجائی بیان اسے ٹی اسلامی جمہوریہ ایران آ اسرائیل نا جلہو و ہروڑنا دُن انگا گام ءِ ہرا جہانی کانود و اقوام متحدہ نا چارٹر نا مسخت و اصول آتا خلاف ورزی ءِ کیرہ، نا دوٹوک لوز آتیٹی مذمت ءِ کرینو۔ سے شنبے نادے آپاکستان نا دفترخارجہ نا رداٹ وزراء خارجہ غاک ریاست آتا وتواجہی و علاقائی سالمیت نا شرف تون اوار اوار گچین ہمسائیگی نا اصول آتیا عمل کننگ و جھیڑہ غاتا پرامن ایسری نا گرج آ زور شاغار۔ اوفک پاریر کہ ایران نا برخلاف اسرائیلی مخامصت ءِ توننگ نا المی گرج ءِ ہرا دے ٹک نیامی ٹی ودوک آ بے چیٹی ٹی مون آبسنے۔ داخطرناک بے چیٹی آ بھاز گڑتی نا درشانی ءِ کرسا اوفک پاریر کہ داڑآن مچ آ ڈیہہ انا امن و سوگوی آ سنگین نتیجہ برآمد مننگ نا گڑتی ءِ، داوڑاٹ اسہ جوان جنگ بندی و امن نا بحالی کن کاریم کننگ نا گرج ءِ۔ وزراء خارجہ غاک پاریر کہ جوہری سلہہ و بھلو کچ اسے آ بھسکاری نا ایلو سلہہ غاتیان پاک دے ٹک نیامی نا علاقہ غاتا جوڑ کننگ نا دمدستی گرج ءِ ہرا تعلقدار جہانی قرارداد آتا رداٹ ڈیہہ انا غٹ ریاست آتیا بیدس استثنیٰ غان لاگو مرے، نیز دے ٹک نیامی نا غٹ ملک آتے جوہری سلہہ غاتا تالان کپننگ(این پی ٹی) نا معاہدہ ٹی اوار مننگ نا دمدستی گرج ءِ۔ اوفک پاریر کہ جہانی ایٹمی توانائی ایجنسی( آئی اے ای اے) نا تعلقدار قرارداد و اقوام متحدہ نا سلامتی کونسل نا فیصلہ غاتا رداٹ جوہری تنصیب آتے شست کننگ آن پاناد کننگ نا بے کچ اہمیت ءِ انتئے کہ داوڑنا کارروائیک جہانی کانود و جہانی انسانی کانود بشمول 1949نا جنیوا کنونشنز نا خلاف ورزی ءُ ۔ اوفک اسیجائی بیان اٹی پاریر کہ ایرانی جوہری پروگرام نا بابت پائیدار معاہدہ اسکان سرمننگ نا اسٹ انگا قابل عمل ذریعہ نا وڑاٹ مذاکرات نا کسر آ ترندی اٹ پدی مننگ نا دمدستی گرج ءِ۔ اومستی پارے کہ جہانی کانود نا تعلقدار قاعدہ نا رداٹ جہانی آبی گزرگاہ تیٹی نیویگیشن نا آجوئی نا رکھ انا اہمیت و میری ٹائم سیکورٹی ءِ نسخان تننگ آن پاناد کننگ المی ءِ۔ اسیجائی بیان نا رداٹ سفارتکاری ، گپ وتران وگچین ہمسائیگی نا اصول آتا پاسداری، جہانی کانود و اقوام متحدہ نا چارٹرنا رداٹ ڈیہہ اٹی تنکی تا ایسر نا اسٹ انگا عمل نا قابل کسر ءِ و دا کہ فوجی ذرائع برجاتنکی نا دیرپاایسر اس اتنگ کپک۔
