اسلام آباد۔16جون (اے پی پی):مزن وزیر شہباز شریف ءَ گشتگ کہ امارات ءَ وتی جدید انتظامی نظام ءَ گوں وتی ملک ءَ را دیمروئی کتگیں ملکانی لڑ ءَ جاہ داتگ، پاکستان امارات ءِ تجربتاں چہ سیت زورگ لوٹیت۔ دو شمبے ءِ روچ ءَ مزن وزیر کارگس ءِ میڈیا ونگ ءِ نیمگ ءَ جاڑی بوتگیں پریس ریلیز ءِ رد ءَ مزن وزیر محمد شہباز شریف ءَ نائب وزیر برائے کیبنٹ افیئرز فار کمپی ٹیٹونس ءُ نالج ایکسچینج عبداللہ نصر لوتاہ ءِ سروکی ءَ متحدہ عرب امارات ءِ مزن تکی ڈل ءَ گند ءُ نند کت۔ ڈل ءَ پاکستان ءَ عرب امارات ءِ سفیر حمد عبید الزعابی ءُ گورنمنٹ نالج ایکسچینج کارگس ءِ عبداللہ ءِ ءُ ابراہیم العلی ھم ھوار ات۔ مزن وزیر ءَ ابوظہبی ءِ گوستگیں تر ءُ تاب ءِ وھد ءَ امارات ءِ صدر محمد بن زید النہیان ءَ گوں گند ءُ نند ءِ ذکر کنان ءَ گوشت کہ گند ءُ نند سک پائدگ مند بوتگ۔ پاکستان ءُ بھارت ءِ جیڈھ ءِ تہا امارات ءِ کرد ءَ پاکستان ءُ بھارت ءِ نیام ءَ جیڈھ ءِ کم کنگ ءَ مزنیں کرد پیلو کتگ۔ مزن وزیر ءَ گوشت کہ پاکستان ءَ وتی انتظامی ڈھانچہ ءِ گہتری ءِ واستہ ڈیجیٹلائزیشن ءُ کاگد لیس ءَ معیشت ءِ وڑیں گامگیج چست کتگ، ایشی ءِ ھواری ءَ بے دیمیں کسٹم سسٹم ھم کارمرد کنگ بوتگ۔ جوانیں حکومت داری ءِ ھاتر ءَ پاکستان ءِ حکومت متحدہ عرب امارات ءِ تجروبت آں چہ سیت چست کنگ لوٹیت تانکہ اے گامگیج گیش موثر جوڑ کنگ بہ بنت۔ مزن وزیر ءَ گوشت کہ ڈیٹا ءِ بنیات ءَ پیسلہ کنگ ءَ را گہتر کنگ ءِ واستہ جوانیں گامگیج کنگ بوھگ ءَ انت۔ متحدہ عرب امارات ءَ وتی جدید انتظامی نظام ءَ گوں وتی ملک ءَ را دیمروئی کتگیں ملکانی لڑ ءَ جاہ داتگ ءُ پاکستان متحدہ عرب امارات ءِ تجروبتاں چہ سیت زورگ ءِ واستا ماندار انت۔ امارات ءِ وزیر عبداللہ نصر ءَ گشتگ کہ امارات ءُ پاکستان ءِ نیام ءَ دیراں چہ براتی سیادی است انت ۔ آئی ءَ امارات ءِ دیمروئی ءِ تہ ءَ پاکستانی کمیونٹی ءِ ھاسیں کرد ساڑات۔ آئی ءَ گوشت کہ ما پاکستان ءِ گوما تجروبت ءُ زانتکاری آنی مٹ ءُ بدلی ءَ چہ وش آں۔ ایشی ءَ پد مزن وزیر ءُ عبداللہ نصر ءَ دوئیں ملک آنی نیام ءَ یک مفاہمت نامہ ءِ دستخط کنگ ءِ مراگش ءَ شریک بوت۔ اے مفاہمت نامہ ءِ چیر دستی ءَ دوئیں ملک ھواریں پڑ آنی تہ ءَ زانت ءُ وت مہ وتی تجربگ، رہشونی ءُ دیمروئی ماڈل آنی تبادلہ ءَ چہ حکومتی کارکردگی ءَ را گہتر کنگ ءِ واستہ کمک کن اَنت۔ اے مفاہمت نامہ ءِ تہ ءَ جوانیں حکومت داری، دیمروئی منصوبگ بندی، سرکاری شوبگ ءِ اصلاحات، انسانی وسائل ءِ دیمروئی، شہری منصوبگ بندی ءُ سائنس ءُ ٹیکنالوجی ءُ دگہ پڑ آنی تہ ءَ کمک ءِ سر ءَ ھوار اِنت۔ مراگش ءَ نائب مزن وزیر ءُ دری کارانی وزیر محمد اسحاق ڈار، منصوبگ بندی ءُ دیمروئی ءِ وزیر ڈاکٹر احسن اقبال، وزیر ءِ تجارت جام کمال خان ءُ ھاسیں کمکار سید طارق فاطمی ءَ ھم بھر زوری کت۔
