اسلام آباد۔ 16جون (اے پی پی) وزیراعظم محمد شہباز شریف خراج تفروک آتا دزگیری نا خبرآتا دمدستی نوٹس ءِ ہلسا پیدوار کرینے کہ باقاعدگی اٹ خراج تروک آتے زیزاریفنگ ءِ اسُل امنا کننگپک، کاروباری برادری و زرکارآتا عزت و شرف ننا خنتیاو اوفتے بے سوب زیزاریفنگ ءِ منپنہ وخت اس کہ او دا باندات آ اسہ خصوصی کمیٹی اس جوڑ کننگ ناپارت کرینے۔ دوشنبے نادے آ وزیراعظم آفس نا میڈیا ونگ آن جاری پریس ریلیز نا رداٹ وزیراعظم محمد شہباز شریف نا کماشی ٹی ایف بی آر نا امور آ جاچ دیوان اس اڈہلک۔ وزیراعظم میڈیا ٹی رپورٹ مروک آ خراج تفروک آتا دزگیری نا باندات آ دمدستی نوٹس ہلک۔ وزیراعظم ءِ معلومدار کننگاکہ سیلز خراج تفروک آتا دزگیری نا اختیار 1990ء نا دہائی آن کانود نا بشخ ءِ ولے بڑزکو عدالت آتا فیصلہ غاتے مون آ تخسا اودے پین مربوط کننگ کن تعلقدار شق آتیٹی ترمیم کننگ انگ ءِ۔ وزیراعظم غٹ باندات آتے ہُننگ آن پد بھاز سختی اٹ پارت کرے کہ داوڑنا ہرترمیم ءِ کاروباری برادری یا خراج تروک آتے زیزاریفنگ کن اسُل کاریم اٹ اتنگپننگک۔ وزیراعظم پارے کہ باقاعدگی اٹ خراج تروک آتے زیزاریفنگ ءِ امنا کننگپک، کاروباری برادری و زرکارآتا شرف و عزت ننا خنتیاءِ و اوفتے بے سوب زیزاریفنگ ءِ منپنہ۔ وزیراعظم دا باندات آ اسہ خصوصی کمیٹی اس جوڑ کننگ نا پارت کرے۔ وزیراعظم پارت کرساپارے کہ خراج کانود اٹی دزگیری نا اختیار بیرہ غیرمعمولی کچ انا خراج تفروک آتسکان محدود مرے۔ وزیراعظم پارت کرے کہ دزگیری نا بابت ایکسٹرنل ریویوو چیک اینڈ بیلنس نا گچین نظام اس جوڑ کننگے، داکانود نا غلط کاریم اٹ اتنگ آن رکھ انا بابت شق آتے فائنانس ایکٹ نا بشخ جوڑ کننگے۔ وزیراعظم پارت کرے کہ دا باندات آ پارلیمان اٹی ساڑی غٹ سیوتی جماعت آتون سلابت ءِ پک کننگے۔ دیوان اٹی بنجائی وزیر دفاع، کانود، واپار ، اقتصادی امور، حوالکاری و شینکاری، وزیر مملکت ریلویز، چیئرمین ایف بی آر ، زرگزرانی امور نا چاہندار و بڑزکو سرکاری کمامدارآک بشخ ہلکر۔
