اسلام آباد ۔ 16جون (اے پی پی) پاکستان پیپلزپارٹی نا قومی اسمبلی نا باسک عبدالقادر پٹیل پارینے کہ ملک ءِ شونداری نا کچ آ دروئی ءِتو ایف بی آر نا قبلہ ءِ درست کروئی مریک، ذاتی سوچ آن پیش تمسا قومی یکجہتی و ملکی مفاد اٹی مون آ ہِننگ نا گرج ءِ۔ دوشنبے نادے آقومی اسمبلی ٹی بجٹ آ شرہ ٹی بشخ ہلسا اوپارے کہ جنگ آتا حالیت و ایشیاء نا بدل مروک حالیت آتیٹی جوڑ مروک آ بجٹ ءِ، ننے ہروڑنا حالیت آتون مون تروئی تمنگ کیک ہراڑکن ننے تیار مروئی مریک۔ اوپارے کہ ننے مرے کہ نن ذاتی سوچ آن پیش تمسا قومی یکجہتی و ملکی مفاد اٹی مون آکان۔ اونان فائلرآتیکن گام گیج و خراج آتا وصولی نا وڑوڈول نا بابت تنقید کرساپارے کہ کاروبار نا حق ہم انکم خراج آفیسر آتا مرضی اتون مشروط کننگانے۔ بیدس نوٹس آن کارروائی کننگ نا اختیار انکم خراج آفیسر آتے تننگ سہی اف، داحالیت آتیٹی دا سمجھوئی ءِ کہ پاکستان اٹی کاروبار مون آ کاہک دا سہی اف۔ سولرآ18 درسد خراج ءِ منپنہ۔ اوپارے کہ ننا ہندی ماہی گیرآتیان کسٹم کلیئرنس ہلنگ نا ہچ ءُ جواز اس اف۔ داحالیت آتیٹی دا جوان ءُ بجٹ اس اف۔ کبینی ٹی زرس کمتی تو واقع مسنے ولے بجٹ اٹی جی ڈی پی نا بابت تروک آ حساب وکتاب سہی اف۔ اگہ ملک ءِ شونداری نا کچ آ دروئی ءِ تو ایف بی آر نا قبلہ ءِ سہی کروئی مریک۔ بیدس نوٹس آن کس اسے نا اکاؤنٹ آتے منجمد کننگ بے سوب ءِ۔ قوم ءِ بھارت نا مقابلہ ٹی جنگ اٹی ہرا سرسہبی ملانے و ہرا خوشی دوئی مسنے اوڑآ نن شکر ءِ ادا کینہ ولے قوم انا دا خوشی دا گام گیج آتا سوب آن گڑتی تیٹی بدل مننگ ءِ۔ نن داڑآ وونٹ کپنہ۔
