اسلام آباد۔ 16جون (اے پی پی) پاکستان نا بڑزکو کہول پارلیمانی ڈل یورپی یونین نا دارالحکومت برسلز اٹی دورہ نا اولیکو ریسہ سرسہبی اٹ پورو کننگ آن پد فرانس نا شار سٹراس برگ آ سرمس، سٹراس برگ اٹی پارلیمانی ڈل انا کماشی ءِ بنجائی وزیر چاگڑدی بدلی و چاگڑدی ہم گرنچی ڈاکٹر مصدق مسعود ملک کیک۔ قومی اسمبلی نا قائمہ کمیٹی امور خارجہ نا چیئرپرسن و مسکوہی وزیرخارجہ حناربانی کھر، مسکوہی وزیرواپار، دفاع و امور خارجہ انجینئر خرم دستگیرخان، ایم کیو ایم نا سینیٹ اٹی پارلیمانی لیڈر و مسکوہی وزیر بحری امور سینیٹر سید فیصل علی سبزواری ، مسکوہی وزیرخارجہ ایمبیسیڈر جلیل عباس جیلانی و مسکوہی سیکرٹری خارجہ ایمبیسیڈر تہمینہ جنجوعہ ئسک ہم ڈل انا بشخ ءُ۔ وزیراعظم محمد شہباز شریف نا کنڈآن مقرر کروک بڑزکو کہولی پارلیمانی ڈل انا دورہ نا مسخت، بھارت تون ساڑی آ بے چیٹی آ پاکستان نا موقف ءِ پیش کننگ و کشمیر نا ویلءِ اقوام متحدہ نا سلامتی کونسل نا قرارداد و کشمیری الس نا است خواہی تا رداٹ تالان کننگ ءِ۔ پارلیمانی ڈل سٹراس برگ اٹی یورپی پارلیمنٹ نا نائب صدر وڈپٹی اسپیکر مس کرسٹل شیلڈ یموس، سویل ایشیائی ملک آتون تعلقداری کن یورپین ڈل، ڈی ساس نا باسک آک، یورپین پارلیمنٹ نا کمیٹی خارجہ امور نا سروک ڈیوڈ مکلسٹر تون اوار اہم یورپی سیاسی جماعت آتا راہشون آتون اوڑدہی کیک۔ داوڑدہی تیٹی پارلیمانی ڈل بھارت نا پاکستان مخالف عزم و جارحانہ گام گیج آتا بابت یورپی کمامدار آتے معلومدار کیک، پارلیمانی ڈل کشمیر نا ویل، دہشت گردی، و بھارت نا کنڈآن جہانی کانود آن روگردانی کرسا، سندھ طاس معاہدہ نا اسہ کنڈی معطلی و اونا مضمر آتیا حوال ایتک و یورپی کمامدار آتے دا باورکرفک کہ بھارت نا کنڈآن آبی وسیلہ غاتے سلہہ نا وڑاٹ کاریم اٹ اتنگ نا بھارتی کوشست ڈیہہ انا امن و سوگوی ءِ بھاز خطرہ غاتیان دوچار کننگ کیک۔
