اسلام آباد۔ 13جون (اے پی پی) قومی اسمبلی ایران آ اسرائیلی جارحیت نا ترند انگا لوز آتیٹی مذمت ءِ کرسا ایران نا حکومت، پارلیمنٹ و قوم اتون پورو یکجہتی نا عزم انا درشانی آ مبنی قرارداد نا امنائی وڑاٹ منظوری ءِ تسنے ہراٹی حکومت آن خواست کننگانے کہ داویل آ اقوام متحدہ نا سلامتی کونسل و او آئی سی نا دمدستی دیوان ءِ بٹنگے تانکہ ایران آ اسرائیلی جارحیت ءِ دمدستی وڑاٹ توننگ مرے۔ جمعہ نادے آ قومی اسمبلی ٹی پاکستان پیپلزپارٹی نا قومی اسمبلی نا باسک سید نوید قمر قرارداد پیش کرے۔ قرارداد اٹی پاننگانے کہ پاکستان نا قومی اسمبلی ایلم ملک اسلامی جمہوریہ ایران نا برخلاف اسرائیل نا بلاجواز جارحیت نا ترندی اٹ مذمت ءِ کیک ہراڑآن ایرانی الس ءِ جونی و مالی نسخان رسینگانے۔ دا ایوان بے کچ مایوسی اتون نوٹ کیک کہ 13جون 2025ء نا تہارساہت آتیٹی کروک آ جلہو آن نئے بیرہ اقوام متحدہ نا باسک ریاست نا وتواجہی و سالمیت نا بھلا خلاف ورزی مسنے بلکن دا جہانی کانود و اقوام متحدہ نا چارٹر نا بنداوی اصول آتا ہم پیدوار خلاف ورزی ءِ۔ داایوان خبڑدار کیک کہ اسرائیل نا داوڑنا پدریسہ جارحیت نئے بیرہ دے ٹک نیامی بلکن مچ آ دنیا ءِ سنگین خطرہ غاتیٹی شاغانے، ہرانا سنگین نتیجہ غاتا زمواری اسرائیل آ بیٹ مریک۔ اقوام متحدہ نا چارٹر نا آرٹیکل 51 نا رداٹ ایران ءِ تینا دفاع نا حق دوئی ءِ، داایوان داہیت انا درشانی ءِ کیک کہ پاکستان اسلامی جمہوریہ ایران نا حکومت ، پارلیمنٹ و الس تون پورو یکجہتی اتون سلوک ءِ و دا جلہواٹی تینا جون تے گوہوک آ تیکن دعاکیک۔ داایوان حکومت آن خواست کیک کہ او دمدستی وڑاٹ اقوام متحدہ نا سلامتی کونسل و اوآئی سی نا دیوان بٹنگے تانکہ ایران آ جارحیت ءِ دمدستی وڑاٹ توننگے، اونا مذمت ءِ کننگے ۔ قومی اسمبلی امنائی وڑاٹ قرارداد نا منظوری ءِ تس۔
