اقوام متحدہ۔ 13جون (اے پی پی) اقوام متحدہ نا جنرل اسمبلی غزہ ٹی برجااسرائیلی جنگ اٹی دمدستی، غیرمشروط و آخبت جنگ بندی و امداد اسکان رسینگ نا خواست آتیا تالان قرارداد نا بھلو گیشتری اسے اٹ منظوری ءِ تس۔ پاکستان و 47 ایلو ملک آتا کمک اٹ سپین نا کنڈآن پیش کروک داقرارداد نا مخ تفی ٹی 149 و مخالفت اٹی 12 وونٹ تما وخت ا س کہ 19 ملک آک رائے شماری ٹی بشخ ہلتور۔ قرارادد نا مخالفت کروک آتیٹی امریکہ، اسرائیل، ارجنٹائن، ہنگری و پیراگوئے ہم اوار ئسر وخت اس کہ بھارت، جارجیا، ایکواڈور، رومانیہ و ایتھوپیا قرارداد آ رائے شماری ٹی بشخ ہلتور۔ قرارداد اٹی بین ءِ جنگ انا سلہہ نا وڑاٹ کاریم اٹ اتنگ نا ترندی اٹ مذمت ءِ کننگا و انسانی امداد آ اسرائیلی ناکہ بندی ءِ پورووڑاٹ چٹفنگ نا خواست کننگا۔ قرارداد اٹی جہانی کانود نا رداٹ شاری تارکھ آ زور شاغنگا ۔ دُن تو جنرل اسمبلی نا قرارداد آتیا عملدرآمد نا ہچ ءُ میکنزم اس ساڑی اف ولے اونا سیاسی و اخلاقی وڑاٹ اہمیت بھاز زیات ءِ۔ 4 جون آامریکہ اقوام متحدہ نا سلامتی کونسل اٹی غزہ ٹی جنگ بندی نا قرارداد ءِ ویٹوکریسس۔ داکان بیدس غزہ ٹی قحط نا حالیت زند آتے خطرہ ٹی شاغنگ ءِ و اقوام متحدہ نا آجووڑاٹ کاریم کروک ولے اسرائیل و امریکہ نا مخ تف تقسیم نا ہند آتیا خور اسکان رسینگ دوئی کننگ نا کوشست اٹی شاری تا شہید مننگ یا ٹھپی مننگ نا حوال آک جاری ءُ۔ جنرل اسمبلی نا صدر فلیمون یانگ خصوصی دیوان نا بناءِ کرسا پارے کہ غزہ ٹی 20 تُو آن برجااسرائیلی جنگ انا ہولناکیک بایدے چٹر۔ اوسلامتی کونسل نا دابابت پدریسہ ژند مننگ و امن و سلامتی ءِ برقرارتخنگ نا تینا بنداوی زمواری تے پورو کننگ اٹ بے سہبی آ تنقید کرے۔ اولس شاری تیکن خور، دیر و دوائی تا عدم فراوانی، یرغمالی تا پدریسہ اسیری و دمدستی جہانی گام گیج آتا گرج ءِ تالان کرسا ڈغاری حالیت آتے ’’ناقابل قبول ‘‘گوندا۔ صدر جنرل اسمبلی پارے کہ نیویارک اٹی بروک آ ہفتہ فرانس و سعودی عرب نا کماشی ٹی اِراریاستی ایسری آ عملدرآمد نا بابت مروک آ بڑزکو کہولی دیوان مقبوضہ فلسطینی علاقہ ٹی امن کن تجدید عہد نا موقع فراوان کیک۔ اقوام متحدہ ٹی فلسطینی سفیر ریاض منصور پارے کہ فلسطینی الس نا برخلاف اسرائیلی جلہو آتے614دے پورو مسنے۔ اوفلسطین نا برخلاف اسرائیلی نا گھیڑ انا کنڈآ اشارہ کرساپارے کہ دا غیرکانودی، غیراخلاقی حالیت آک برجاسلنگ کپسہ، اودے دمدستی وڑاٹ سلنگ و توروئی مریک، ہراڑے 20 لکھ آن زیات مخلوق ءِ پدریسہ بمباری، بھسکاری و رزاک اٹ بین نا شست کننگانے۔
