ابوظہبی۔12جون (اے پی پی): مزن وزیر محمد شہباز شریف ءُ امارات ءِ صدر شیخ محمد بن زید النہیان ءَ دو نیمگی سیادی ءِ جوانیں رجحان ءُ درستیں تک ءُ پھنات آنی سر ءَ برجاھیں پیشرفت ءِ سر ءَ دل یکیمی ءِ درشانی کت ءُ نزیکیں رابطہ ءِ برجاہ دارگ ءُ دمگی دیمروئی ءِ واستہ یکجائی ءَ کار کنگ ءِ سر ءَ تپاک کت۔ پنچ شمبے ءِ روچ ءَ مزن وزیر کارگس ءِ میڈیا ونگ ءِ نیمگ ءَ جاڑی بوتگیں بیان ءِ رد ءَ مزن وزیر محمد شہباز شریف ءَ متحدہ عرب امارات ءِ سرکاری تر ءُ تاب ءِ ساھت ءَ امارات ءِ صدر ءُ ابوظہبی ءِ حاکم شیخ محمد بن زید النہیان ءَ گوں گند ءُ نند کتگ۔ گند ءُ نند ءَ پاکستان ءُ متحدہ عرب امارات ءِ نیام ءَ گہتریں براتی سیادی ءِ سر ءَ زور پر دات کہ ایشی ءِ بنیات وت مہ وتی بھروسہ، یکجائی شرپ ءُ نزیکیں کمک ءِ راجدپتر ءِ سر ءَ اِنت۔ دوئیں رہشون آں وت مہ وتی دلچسپی ءِ دو نیمگی، دمگی ءُ جھان ءِ جیڈھ آنی سر ءَ ھم ھیال ءُ لیکہ ءِ درشان کت ءُ کلیدی پڑ آنی تہ ءَ کمک ءَ را گیش گیش کنگ ءِ واستہ وتی جزم ءِ پدا پدر کت۔ مزن وزیر ءَ پاکستان ءُ بھارت ءِ نیام ءَ جیڈھ آناں کم کنگ ءَ امارات ءِ جوڑیشت ءِ کرد ءِ سر ءَ دل ءِ جہلانکی ءَ چہ منت واری ءِ درشان کت۔ آئی ءَ دمگ ءَ امن، گپ ءُ تران ءُ برجائی ءِ دیمروئی ءِ تہ ءَ امارات ءِ جوانیں کرد ءِ ساڑات۔ دوئیں بامرد آں وت مہ وتی سیادی آنی جوانیں دلگوشی ءُ توامیں پڑ ءَ برجاھیں پیشرفت ءِ سر ءَ دل یکیمی ءِ درشان کت۔ رہشون آں نزیکیں سیادی ءِ برجائی ءُ دمگی امن ءُ وشھالی ءِ یکجائی مول ءُ مراد آناں دیم ءَ برگ ءِ واستہ یکجائی ءَ کار کنگ ءِ سر ءَ تپاک کتگ۔ مزن وزیر ءَ امارات ءِ صدر ءَ را زوت پاکستان ءِ تر ءُ تاب ءِ دعوت ءِ یک رندے پدا گوشت۔ گند ءُ نند ءِ تہ ءَ نائب مزن وزیر ءُ درئی کارانی وزیر محمد اسحاق ڈار، چیف آف آرمی اسٹاف فیلڈ مارشل سید عاصم منیر، وفاقی تہی کارانی وزیر سید محسن رضا نقوی، وفاقی وزیر ءِ ھال ءُ اھوال عطا اللہ تارڑ ءُ ھاسیں کمکار سید طارق فاطمی ھم ھوار اتنت۔
