برسلز۔ 12جون (اے پی پی) مسکوہی وزیر خارجہ و چیئرمین پیپلزپارٹی بلاول بھٹو زرداری پارینے کہ یورپی یونین بھارت آ سندھ طاس معاہدہ ءِ معطل کننگ کون آ کانود آن ایڑتر گام گیج آتیان پاناد کننگ آ زور شاغے، پاکستان امن نا خواہندار ءِ و کشمیر تون اوار غٹ ویل آتے مذاکرات نا کمک اٹ ایسر کننگ نا مخ تف ءِ۔ پنچ شنبے نادے آ سفارت خانہ غان جاری بیان نا رداٹ بلاول بھٹو زرداری نا کماشی ٹی پاکستان نا بڑزکو کہولی پارلیمانی ڈل یورپین پارلیمنٹ اٹی جہانی واپاری کمیٹی (آئی این ٹی اے) نا سروک برنڈ لانجے تون اوڑدہی کرے ہراوخت آ واپار تون اوار علاقائی حالیت آتا بارواٹی سرجمی اٹ گپ وتران کننگا۔ پارلیمانی ڈل اوڑدہی ٹی بھارت نا کنڈآن کروک آ ساڑی آ جارحانہ گام گیج و ڈیہہ انا بگڑینگوک آ حالیت آتا بارواٹی سرجمی اٹ حوال تس۔ بلاول بھٹو زرداری پارے کہ یورپی یونین کانود نا حکمرانی نا علمبردار ءِ، نن اومیت کینہ کہ او بھارت آ دارداٹ زور شاغک کہ او سندھ طاس معاہدہ ءِ معطل کننگ کون آ کانود آن ایڑتر گام گیج آتیان پانادکے۔ اوپارے کہ پاکستان امن نا خواہندار ءِ و کشمیر تون اوار غٹ ویل آتے مذاکرات نا کمک اٹ ایسر کننگ نا مخ تف ءِ۔ بلاول بھٹو زرداری پارے کہ بھارت نا کنڈآن شاری آبادی ءِ شست کننگ و سندھ طاس معاہدہ ءِ اسہ کنڈی وڑاٹ معطل کننگ نئے بیرہ جہانی کانود بلکن بین الریاستی اخلاقیات و معاہداتی اصول آتا ہم بھلا خلاف ورزی ءِ۔ بنجائی وزیر چاگڑدی بدلی و چاگڑدی ہم گرنچی ڈاکٹر مصدق مسعود ملک و مسکوہی نگران وزیرخارجہ ایمبیسیڈر جلیل عباس جیلانی ئسک ہم اوڑدہی ٹی ساڑی ئسر۔
