کوئٹہ۔ 12 جون (اے پی پی) سعودی عرب آن حج انا فرض ءِ ادا کننگ آن پد حج مبارک آن حاجی تے ہرفسا اولیکو جہاز کوئٹہ غا سرمس۔ پنچ شنبے نادے آ جدہ غان قومی ایئرلائن پی آئی اے نا حج جہاز انا کمک اٹ 153 حاجی کوئٹہ انٹرنیشنل بالی پٹ آ سرمسر تو وزیراعلیٰ بلوچستان نا سلاہکار چاگڑد وموسمیاتی بدلی نسیم الرحمان خان کوئٹہ بالی پٹ آ حاجی تے جم وجوش اٹ بخیرکرسا اوفتے وطن آ پدی بننگ آ بخیراٹ پارے۔ داوخت آمحکمہ مذہبی امور ، پاکستان انٹرنیشنل ایئرلائن و ایلو تعلقدار ادارہ غاتا آفیسر آک ہم ساڑی ئسر۔ محکمہ مذہبی امور نا رداٹ حج مبارک آن قومی ایئرلائن نا کمک اٹ حاجی تا پدی بننگ نا چرجوئی 30 جون اسکان برجاسلک۔ داوخت آ حاجیک’’اے پی پی‘‘ تون گپ وتران کرساپاریر کہ نن گچین بست وبند آتیاخادم الحرمین الشریفین شاہ سلمان بن عبدالعزیز ، سعودی ولی عہد شہزادہ محمد بن سلمان و سعودی وزارت ءِ حج و عمرہ نا بے مٹ بست وبند آتیا منت واراُن۔ حاجیک وزارت مذہبی امورپاکستان نا کنڈآن گچین بست وبند آتا ستاءِ کرسا وزیراعظم و بنجائی حکومت نا ہم منت واری ءِ ہرفیر۔
