اسلام آباد۔ 12جون (اے پی پی) بنجائی وزیر ڈٹ بندی، شونداری، اصلاحات و خصوصی گام گیج پروفیسر احسن اقبال پارینے کہ پاکستان ءِ داسہ بیرہ ڈٹ آتیان پلیٹ فارم و ہیت آتے اٹ نتیجہ غاتا کنڈآ ہنوئی مریک، حکومت، تعلیمی ادارہ، صنعت و ورناک اواری اٹ اسہ ڈیٹاسمارٹ ، کلاؤڈ آن شُپ و مسابقتی پاکستان اس تفرہ۔ پنچ شنبے نادے آ نیشنل اوپن ڈیٹا پورٹل نا باضابطہ بناءِ کرسا اودے پاکستان نا ڈیجیٹل انقلاب نا کنڈآ اسہ تاریخی گام اس گوندا ہراٹی بڑزکو حکومتی، تعلیمی و تکنیکی چاہندار آک بشخ ہلکر۔ بنجائی وزیر پارے کہ دابیرہ اسہ ڈیجیٹل پلیٹ فارم اسے نا رونمائی اف بلکن پاکستان نا قومی عزم و پوسکن ڈیجیٹل زرگزران نا کنڈآ ہنسا گام تا نشانی ءِ، نن بیرہ ڈیٹا انقلاب نا مشاہدہ ءِ کپننگ اُن بلکن اودے مون آ دننگ نا ارادہ تخنہ۔ وزیر ڈٹ بندی پارے کہ پاکستان نا شونداری نا پوسکن آ داستان داسہ ڈیٹا، کوڈ و کلاؤڈ کمپیوٹنگ نا زبان اٹی نوشتہ کننگک۔ دا عارضی ءُ حکمت عملی اس اف بلکن اسہ قومی گرج اسے۔ ڈیٹا داسہ بیرہ معلومداری تا ذریعہ اف بلکن اختراع ، شفافیت و گچین حکمرانی نا تمبہ ءِ۔ اوپارے کہ پاکستان بیورو آف سٹیٹس ٹکس(پی بی ایس) و لاہور یونیورسٹی آف مینجمنٹ سائنسز(لمز)نا شریداری اٹ تیارکروک نیشنل اوپن ڈیٹا پورٹل 14 چندی بشخ آتیٹی 1000 آن زیات ڈیٹا سیٹس فراوان کیک ہرافتے ٹی تعلیم، جان جوڑی، زرگزران ، کشت وکشار و چاگڑدی امور اوار ءُ۔ دا پلیٹ فارم آن پولکار ، پالیسی ساز، کاروباری خواجہ و لس شاری اسہ وڑاٹ فائدہ ہرفنگ کیرہ۔ اوپارے کہ وزارت تینا حکمت عملی نا پنچ اہم بشخ آتا تعین ءِ کرینے، برآمد آتا مون آ دننگ، ای۔ پاکستان و ڈیجیٹل اختراع، زرگزرانی بریبری، چاگڑدی پائیداری و توانائی و بنداوی پنجر نا شونداری اوار ءِ۔ احسن اقبال پارے کہ کلاؤڈ کمپیوٹنگ، مصنوعی ذہانت و سیٹلائٹ ڈیٹا نا کاریم اٹ اتنگ ڈٹ بندی، جان جوڑی، تعلیم و چاگڑدی پالیسی تیٹی انقلاب اس اتیک۔ ڈیجیٹل مردم شماری، قومی ڈیٹا سٹریٹجی و ملک گیر ڈیٹا سینٹرآتا جوڑ کننگ کون آ گام گیج دا وژن نا عملی درشانی ءِ۔ وزیر ڈیٹا سائلوز، مہارت نا کمتی، کنیکٹیوٹی نا ویل و سائبر سیکورٹی کون آ چیلنج آتا پیدواری ءِ کرساپارے کہ حکومت دافتیا پبی چکار کننگ ءِ۔ ننے تعلیمی نصاب اٹی ترند رفتار بدلی اتوئی مریک تانکہ ہزار آ ڈیٹا سائنسدان، انجینئرزو آرکیٹیکٹس نا تیاری ممکن مرے۔ وزیر ورناو جامعہ غاتیا زور شاغا کہ ڈیٹا سائنس، اے آئی و کلاؤڈ ٹیکنالوجی ءِ بیرہ کمپیوٹر سائنس اسکان محدود تخپس بلکن اوفتے کشت وکشار، جان جوڑی، ٹرانسپورٹ و زرگزران اٹ عملی وڑاٹ تیناکیر۔ اوپارے کہ ’’کوانٹم ویلی پاکستان‘‘ نا تغ داسہ حقیقت جوڑ مننگ ءِ۔ پروفیسر احسن اقبال پارے کہ پاکستان ءِ داسہ بیرہ ڈٹ آتیان پلیٹ فارم و ہیت آتیان نتیجہ غاتا کنڈآ ہنوئی مریک۔ حکومت تعلیمی ادارہ، صنعت و ورناک اواری اٹ اسہ ڈیٹا سمارٹ، کلاؤڈ آن شُپ و مسابقتی پاکستان اس تفرہ۔
