اسلام آباد۔ 12جون (اے پی پی) بنجائی وزیر داخلہ محسن نقوی پارینے کہ بھلا عئید آ بنجائی دارالحکومت اٹی بے مٹ سفائی سی ڈی اے نا آفیسر و عملہ نا دے و نن خواری و شاری تا کمکاری نا بھرم ءِ ، زیروویسٹ آپریشن اٹی بشخ ہلوک آ ملازم آتے کن اسہ بنداوی تنخواہ اس بطور انعام تننگ و ہڑدے ئی اجرت آ کاریم کروک آ سینیٹری ورکرآتے 15 ہزار روپئی فی کس تننگ نا پڑو کیوہ، نن غٹ اواری اٹ اسلام آباد ءِ جہانی آب انا شار اس جوڑ کروئی ءِ۔ داخیال آتا درشانی ءِ او سی ڈی اے نا بھلا عئید انا وخت آ فرض سرتروک سینٹری ورکرآتا اعزاز اٹی اڈ ہلوک خصوصی دود آن تران اٹی کرے۔ وزیرداخلہ دے ونن خواری اٹ فرض سرتننگ آ سینٹری ورکرآتے خراج تحسین پیش کرے۔ اوچیئرمین سی ڈی اے محمد علی رندھاوا، ڈپٹی کمشنر، اسسٹنٹ کمشنرز و فیلڈ ٹیم تے ہم مبارکبادی ہرافک عئید انا چھٹی تیٹی دے ونن داآپریشن نا چاروکی ءِ کریر۔ وزیرداخلہ زیروویسٹ آپریشن اٹی بشخ ہلوک آ ملازم آتیکن اسہ بنداوی تنخواہ و ہڑدے ئی اجرت آ کاریم کروک آ ورکرآتے 15 ہزار روپئی فی کس بطور انعام تننگ نا پڑو کرے۔ محسن نقوی پارے کہ 3 دے اٹی اسلام آباد نا شاری و خلقی علاقہ غاتیان 2400 ٹن آلائش و ویسٹ ءِ ہرفنگا، اولیکو وار ڈرون کیمرہ غاتے اٹ سفائی آپریشن نا چاروکی ءِ کننگا، 2500 ورکرز و 250 گاڈیک زیروویسٹ آپریشن اٹی بشخ ہلکر۔ اوپارے کہ بھلا عئید انا وخت آ اسلام آباد اٹی زیروویسٹ آپریشن آ شاریک پبی است جمی نا درشانی ءِ کرینو۔ محسن نقوی پارے کہ شاری تا است جمی سی ڈی اے نا کارکڑد نا برملااعتراف ءِ۔ اواسلام آباد نا شاری تا ہم منت وار ہرافک سفائی نا بابت فیلڈ ٹیم آتون پورو کمک کریر۔ محسن نقوی پارے کہ آفیسر آتیان ہلیس ملازم آتسکان غٹ اسہ ٹیم اس جوڑ مرسا ڈلیور کریر ہراڑآ او مبارکباد ناحقدار ءُ۔ وزیرداخلہ پارے کہ سی ڈی اے ، ایم سی آئی، ضلعی انتظامیہ، اسلام آباد پولیس، سیف سٹی و ٹریفک پولیس دے ونن کاریم کریر، غٹ محکمہ غاک ہم گرنچی اٹ کاریم کریر و ادارہ جاتی پرخ آن اینک بیرہ السی خذمت ءِ اولیت تسر ہراڑآ اوفتے خراج تحسین پیش کیوہ۔ اوگچین مانیٹرنگ آ سیف سٹی ٹیم انا کارکڑد نا ہم ستاءِ کرے۔ وزیرداخلہ پارے کہ اسلام آباد شار ءِ تینا تکسا اودے ساف ستھرا و سرسوز تخنگ ءِ، ننے غٹ ءِ اواری اٹ اسلام آباد ءِ جہانی آب انا شار اس جوڑ کروئی ءِ۔ چیئرمین سی ڈی اے محمد علی رندھاوا ہم دود آن تران کرے و فیلڈ ٹیم تا منت واری ءِ ہرفے۔ بنجائی سیکرٹری داخلہ خرم آغا، چیئرمین سی ڈی اے محمد علی رندھاوا، آئی جی اسلام آباد پولیس علی ناصر رضوی، ڈی سی اسلام آباد عرفان میمن، ڈی جی سیف سٹی و تعلقدار آفیسر آک ہم دوداٹی بشخ ہلکر۔
