اسلام آباد۔ 11جون (اے پی پی) بنجائی وزیر خزانہ سینیٹر محمد اورنگزیب پارینے کہ تنخواہ دار تپہ ءِ زیات آن زیات ریلیف تننگ خوانہ، تنخواہ تیٹی ودکی آن خزانہ غا 28آن 30 ارب روپئی نا ودکی بھاریم تمک۔ چارشنبے نادے آ پوسٹ بجٹ پریس کانفرنس اٹی وزیرخزانہ پارے کہ وزیراعظم و اونا کوشست ئس کہ تنخواہ دار تپہ ءِ اخس ریلیف تننگ مرے اوتننگے، ولے داٹی نن تینا مالی گنجائشت نا رداٹ ہی ہِننگ کینہ، ہنداوڑ نیامی درجہ نا کارپوریٹ بشخ اکن سپر خراج اٹی 0.5 درسد نا کمتی کننگانے۔ اوپارے کہ تعمیراتی بشخ اٹی خراج کم متنے بلکن کوشست کننگانے کہ ٹرانزیکشن نا خڑچ و خڑچ آتیٹی کمتی اتنگے، 5 مرلہ اُراجوڑ کروک آتے مارگیج فنانسنگ اٹی آسراتی فراوان کننگ اُن، دارداٹ سٹیٹ بینک اتون ننا گپ و تران برجاءِ و دا چرجوئی ءِ پدریسہ مون آ ودفنگک۔ اونا پاننگ ئس کہ تنخواہ و پنشن نا بابت بنچ مارک بایدے مرے، مچ آ دنیا ٹی کبینی نا کچ اٹ ودکی مریک، حکومت خراج آتیٹی زیات ودکی کتنے۔ وزیرخزانہ پارے کہ مالی سال 2022اٹی خڑچ آتیٹی 15.9 درسد، مالی سال 2023اٹی 23.6درسد و 2024اٹی 12.2 درسد ودکی مس۔ اونا پاننگ ئس کہ سیکرٹری خزانہ پارے کہ تنخواہ تیٹی 10 درسد ودکی آن خزانہ غا 28 آن 30 ارب روپئی نا ودکی بھاریم تمک۔
