کوئٹہ۔ 11 جون (اے پی پی) مسلم لیگ (ن) بلوچستان نا نائب صدر سردار زادہ نعمان خان ناصر بنجائی بجٹ ءِ السی است خواہی تا ترجمانی گوندسا پارینے کہ انکم خراج اٹی کمتی و پراپرٹی آ ریلیف کون آ پڑوآک، بلوچستان نا چندی علاقہ غاتیٹی ڈیم تا تفنگ کن 5 ارب روپئی و وزیراعظم یوتھ اسکل ڈویلپمنٹ نا بجٹ اٹی ودکی، بے نظیر انکم سپورٹ پروگرام کن 716 ارب روپئی جتا کننگ نا براہ راست فائدہ نیامی تپہ ءِ رسینگک۔ چارشنبے نادے آ ’’اے پی پی‘‘ تون گپ وتران کرسا اوپارے کہ بنجائی بجٹ اٹی تنخواہ و پنشن اٹی ودکی، کشت وکشار نا بشخ اکن 4 ارب روپئی جتا کننگ، جائیداد نا ہلنگ آ ودہولڈنگ خراج نا کچ اٹی کمتی و فیڈرل ایکسائز ڈیوٹی نا چٹفنگ نا اثر غٹ بشخ آتیان تعلق تخوک آ بندغ آتیا تمک۔ پاکستان مسلم لیگ (ن) بلوچستان نا نائب صدر سردارزادہ نعمان خان ناصر پارے کہ وزیراعظم شہباز شریف نا کماشی ٹی جوڑ حکومت زرگزرانی مشکل آتیان پد ہم بریبر و الس دوست ءُ بجٹ اس پیش کرینے۔
