اسلام آباد۔ 11جون (اے پی پی) وزیراعظم محمد شہباز شریف سٹاک مارکیٹ تاریخ نا بڑزکو انگا کہول اسہ لکھ 24 ہزار پوائنٹ آتیا سرمننگ آ است جمی نا درشانی ءِ کرساپارینے کہ سٹاک مارکیٹ اٹی ترندی نا رجحان زرکار وکاروباری شخصیت آتا الس دوست بجٹ آ پت انا درشانی ءِ، بجٹ اٹی لس بندغ آ خراج نا پین بھاریم شاغنگتنے۔ چارشنبے نادے آ پی ایم آفس نا میڈیا ونگ آن جاری بیان نا رداٹ وزیراعظم پارے کہ تنخواہ تیٹی ودکی و خراج اٹی کمتی آن نوکری پیشہ بندغ آتے ریلیف ملک۔ اوپارے کہ الحمداللہ ملکی زرگزرانی شونداری نا سفر بناکرینے، پاکستانی الس قربانی تسر، داسہ ننے غٹ ءِ اواری اٹ لس بندغ نا زند اٹی گچینی اتنگ کن خواری کروئی ءِ۔ وزیراعظم پارے کہ کبینی نا کچ اٹی کمتی، زرمبادلہ نا کوڑی، زرراہی تس و برآمد آتیٹی ودکی زرگزرانی ٹیم انا دے و نن خواری نا سوب آن ممکن مس ۔ اوپارے کہ پاکستان نا ڈیفالٹ نا دنگ آن واپسی، زرگزرانی سوگوی و شونداری نا سفر نا بناکننگ معجزہ ءُ۔ زرگزرانی ٹیم انا خواری و پاکستان نا فائدہ غاتے اولیت تننگ نا سوب زرگزرانی کہول آ دا بے مٹ ٹرن اوور تاریخ اٹی روشنا لوز آتے اٹ نوشتہ کننگک۔
