اسلام آباد۔ 11جون (اے پی پی) بنجائی وزیر خزانہ ومحصولات سینیٹر محمد اورنگزیب پارینے کہ پنجرجاتی بنداوتیا ملک ءِ مون آ دننگ کن زرگزران نا بنداوی ڈی این اے ءِ بدل کننگ المی ءِ، ننا کوشست ءِ کہ جم وڑاٹ ٹیرف رجیم اٹی 4 درسد نا کمتی اتنگے، 2 ٹریلین نا ودکی خراج گام گیج آتیٹی 312 ارب روپئی نا پوسکن ءُ خراج ءُ، 2 ٹریلین نا ودکی ہدف آتا زیات تر بشخ وتواجہ نمو و انفورسمنٹ نا گام گیج آتیان دوئی کننگک، 9.4 ٹریلین نا غیردستاویزی زرگزران ءِ دستاویزی کننگ المی ءِ، بجلی نا بل آتیا 10 درسد سرچارج عائد کننگتنے۔ چارشنبے نادے آ سیکرٹری خزانہ امداداللہ بوسال، چیئرمین ایف بی آر و حکومت نا زرگزرانی ٹیم انا ایلو باسک آتون اوار بجٹ آن پد پریس کانفرنس اٹی وزیرخزانہ پارے کہ بروک آ مالی سال نا بنجائی بجٹ اٹی ٹیرف اصلاحات آ خاص چکار کننگانے ہرانا بھلو اہمیت اسے، دانا اولیکو مسخت پروٹیکٹڈ رجیم ءِ بدل کننگ ءِ تانکہ کیش و انسانی وسیلہ غاتیٹی گچینی برے داڑآن برآمدی بشخ ءِ ہم فائدہ رسینگک، حکومت سمجھک کہ پنجرجاتی بنداوتیا ملک ءِ مون آدننگ کن زرگزران نا بنداوی ڈی این اے ءِ بدل کننگ المی ءِ۔ وزیرخزانہ پارے کہ 7 ہزار ٹیرف لائن آن 4 ہزار آ ودکی کسٹم ڈیوٹی صفر کننگانے، 2700 ٹی کسٹم ڈیوٹی نا کچ ءِ کم کننگا، ہنداوڑ 2 ہزار ہندن ءُ ٹیرف لائن ءُ ہرافتا تعلق خام مال آن ءِ و داڑآن برآمدی صنعت ءِ پک وڑاٹ فائدہ رسینگک، ٹیرف اصلاحات نا دا چرجوئی برجاسلک وننا کوشست ءِ کہ جم وڑاٹ ٹیرف رجیم اٹی 4 درسد نا کمتی اتنگے۔ وزیرخزانہ پارے کہ وزیراعظم و اونا کوشست ئس کہ تنخواہ دار تپہ ءِ اخس ریلیف تننگ مرے اوتننگے ولے داٹی نن تینا مالی گنجائشت نا رداٹ ہِننگ کینہ، ہنداوڑ نیامی درجہ نا کارپوریٹ بشخ اکن سپر خراج اٹی 0.5 درسد نا کمتی کننگانے۔ اوپارے کہ تعمیراتی بشخ اٹی خراج کم متنے بلکن کوشست کننگانے ٹرانزیکشن نا خڑچ و خڑچ آتیٹی کمتی اتنگے، 5 مرلہ اُراجوڑ کروک آتے مارگیج فنانسنگ اٹی آسراتی فراوان کننگ اُن، دارداٹ اسٹیٹ بینک تون ننا گپ وتران برجاءِ و دا چرجوئی ءِ پدریسہ مون آ دننگک۔ وزیرخزانہ پارے کہ آئی ایم ایف تون طے مروک امور نا رداٹ کھد و جوجک کسفوک دوائی تیا ودکی خراج عائد کروئی ئس ہرانا مسخت استثنائی رجیم نا چٹفنگ ءِ ، وزیراعظم نا پارت آ تدوک آ سال ننا آئی ایم ایف تون گپ وتران مس کہ دا خراج ءِ خلنگپ، داسہی کنڈآ گام اسے۔ اوپارے کہ خراج نا تعمیل و اصلاحات نا عمل مون آہِننگ ءُ، داسال جی ڈی پی نا کچ آن خراج آتا کچ 10.3 درسد ئس ہرابروک آ مالی سال اٹی 10.9 درسد مریک۔ اوپارے کہ 2 ٹریلین نا ودکی خراج گام گیج آتیٹی 312 ارب روپئی نا پوسکن ءُ خراج ءُ ، 2 ٹریلین نا ودکی ہدف آتا زیات تر بشخ وتواجہ نمو و انفورسمنٹ نا گام گیج آتیان دوئی کننگک دابابت نن کانود جوڑ کننگ نا کنڈآ کانہ و پارلیمنٹ نا ہڑتوم آ ایوان تے پت اٹی ہلینہ اگہ انفورسمنٹ نا گام گیج آک مفسہ تو ننے 400 آن 500 ارب روپئی اسکان نا خراج خلوئی تمک۔ وزیرخزانہ پارے کہ تنخواہ وپنشن اٹی ودکی نا تعلق افراط زر اتون ءِ، پنشن اصلاحات نا عمل برجاءِ، حکومت پنشن ءِ افراط زر اتون منسلک کرینے۔ اوپارے کہ کشت وکشار زرگزران نا انجن ءِ ، کشاری جی ڈی پی ٹی ڈیری ولائیو اسٹاک نا بشخ 60 درسد نا خڑک ءِ، سٹوریج آسراتی، فنانسنگ اٹی ودکی و چنکا بزغرآتے وام تننگک، دابابت صوبہ غاتون اواری اٹ کاریم کینہ ہرابشخ آک صوبہ غاتیا ہنانو، بنجائی حکومت اوفتے ٹی پبی کمک فراوان کیک۔ اوپارے کہ تنخواہ و پنشن نا بابت بنچ مارک بایدے مرے، مچ آ دنیا ٹی کبینی نا کچ اٹ ودکی مریک، حکومت خراج آتیٹی زیات ودکی کتنے، داڑآن چپ کفایت شعاری و خڑچ آتیٹی کمتی کننگانے، داسال حکومتی خڑچ آتیٹی 1.9 درسد نا زرس ودکی مسنے، حکومت سبسڈی تے چٹفنگ ءِ وخت اس کہ وام تا انتظام و انصرام ءِ ہم گچین کننگ انگءِ، بنجائی حکومت نا خڑچ آتیٹی کمتی ننا اولیت ءِ ، تینا لیپ ءِ ہرسا نت تے مریفوئی ءِ انتئے کہ اخس کہ آسراتی الس ءِ فراوان کننگ انگ ءِ او وام ہلسا تننگ انگ ءِ۔ وزیرخزانہ پارے کہ زرگزران ءِ دستاویزی جوڑ کننگ وخت انا گرج ءِ، داوخت آ غیردستاویز زرگزران نا کچ 9.4 ٹریلین ءِ۔ وزیرخزانہ پارے کہ این ایف سی نا بابت امور صوبہ غاتا سلابت اٹ مون آدننگک، این ایف سی نا بابت پنداری تے بٹنگ انگانے، وزیراعظم تینٹ پارینے کہ اگست اٹی این ایف سی نا دیوان مریک۔ وزیرخزانہ پارے کہ بجلی نا بل آتیا 10 درسد سرچارج عائد کننگتنے، وزیر و پارلیمنٹرین آتا تنخواہ تیٹی ودکی نا بابت سوج آ وزیرخزانہ پارے کہ آخیریکو وار 2016 ٹی وزیر آتا تنخواہ تے ایڈجسٹ کننگاسس اوکان پد اوٹی ہچ ءُ بدلی اس کننگتنے، ہنداسوب آن تنخواہ تیٹی ودکی زیات نظربننگ ءِ۔ بنجائی سیکرٹری خزانہ امداداللہ بوسال داوخت آپارے کہ کھد و جوجک کسفوک آ دوائی تیا تدوک آ سال خراج لگوئی ئس، وزیراعظم نا پارت آ نن جہانی مالیاتی فنڈ اتون گپ وتران کرین و اوڑتون قول کرین کہ بروک آ مالی سال اٹی اونا اطلاق ءِ کننگک۔ اوپارے کہ کشت وکشاراٹی گڑاس گام گیج صوبہ وخت اس کہ گڑاس بنجاءِ کروئی ءِ، نن آئی ایم ایف ءِ قائل کرین کہ داسال خراج خلنگپ، ایگری فنانس آ کاریم مننگ ءِ، وزارت قومی غذائی رکھ و پٹ وپول اٹی وزیراعظم نا پارت آ ٹاسک فورس اس ہم جوڑ کننگانے، دا گام گیج آتا بنداوی مسخت کشت وکشار نا مون آدننگ ءِ۔ سیکرٹری خزانہ پارے کہ برجامالی سال اٹی خڑچ آتا رجحان ءِ ہُننگے تو حکومت حتیٰ المقدور کوشست کرینے کہ خڑچ آتا مون ءِ توننگے ہراڑے گرج ئس ہموڑے خڑچ آتے کننگا ہنداسوب آن برجامالی سال اٹی خڑچ آتیٹی بیرہ 1.9درسد نا زرس ودکی مس، مالی سال 2022اٹی خڑچ آتیٹی 15.9 درسد، مالی سال 2023اٹی 23.6 درسد و 2024اٹی 12.2 درسد ودکی مسوسس۔
