اسلام آباد۔ 11جون (اے پی پی) وزیراعظم محمد شہباز شریف 12 جون آ متحدہ عرب امارات نا سرکاری دورہ ءِ کیک۔ چارشنبے نادے آ ترجمان دفترخارجہ نا رداٹ دا دورہ پاکستان و متحدہ عرب امارات نا نیام اٹ برادرانہ تعلقداری نا عکاسی ءِ کیک ہرا تین پہ تینی پت ، اسیجائی قدر و چندی بشخ آتیٹی خڑکی کمکاری آ تالان ءِ۔ وزیراعظم تون اوار اسہ بڑزکو کہولی ڈل اس ہم مریک ہراٹی نائب وزیراعظم و وزیرخارجہ سینیٹر محمد اسحاق ڈار ، بنجائی وزیرو ایلو بڑزکو آفیسر آک ہم اوار مریرہ۔ وزیراعظم شہباز شریف متحدہ عرب امارات نا سرکڑدہ غاتون بڑزکو کہولی اوڑدہی کیک ہراٹی متحدہ عرب امارات نا صدر و ابوظہبی نا حکمران شیخ محمد بن زید النہیان تون ہڑتوم آ کنڈآتا اوڑدہی ہم اوار ءِ۔ بڑزکو کہولی گپ وتران اٹی تین پہ تینی است خواہی و گڑتی نا گیشتر ہڑتوم آکنڈآتا، علاقائی و جہانی امور آ گپ وتران کننگک۔ بیان نا رداٹ وزیراعظم نا دورہ ءِ پاکستان و متحدہ عرب امارات نا نیام اٹ متکن آبرادرانہ تعلقداری تے پین سوگو کننگ، اقتصادی تعلقداری تے پین کڑمب کننگ و کثیر جہتی کمکاری ءِ مون آدننگ اٹ کمکار مریک۔ بیان اٹی مستی پاننگانے کہ دا دورہ پاکستان و متحدہ عرب امارات نا تین پہ تینی فائدہ مند سٹریٹجک پارٹنر شپ ءِ سوگوی تننگ، تین پہ تینی است خواہی نا ساڑی بشخ آتیٹی کمکاری ءِ ودفنگ و ہڑتوم آکنڈآتا خوشگوار تعلقداری تے پین سوگو کننگ کن پوسکن ءُ کسر پٹنگ نا اسیجائی عزم انا درشانی ءِ۔

متعلقہ مضامینمصنف کی طرف سے مزید