اسلام آباد۔ 11 جون (اے پی پی) بنجائی وزیر داخلہ محسن نقوی پارینے کہ غٹ ذیلی ادارہ غاتا نیام اٹ تین پہ تینی کمکاری بے کچ المی ءِ، غٹ ادارہ غاک اسہ ایلو نا کاریم نا کچ آن پبی فائدہ ہرفر و الس نا زند آتیٹی آسانی ودی کیر، ہیلکاری کورس آتیٹی بیرہ میرٹ آ پورو سلوک آ آفیسر آتے پندار کننگے۔ داخیال آتا درشانی ءِ او چارشنبے نادے آ تینا کماشی ٹی وزارت داخلہ ٹی اہم دیوان اٹی گپ وتران کرساکرے۔ دیوان اٹی وزارت داخلہ نا غٹ ذیلی ادارہ غاتا سروک آک بشخ ہلکر۔ دیوان اٹی وزارت داخلہ نا غٹ ذیلی ادارہ غاتا نیام اٹ تین پہ تینی کمکاری ءِ ودفنگ نا فیصلہ کننگا۔ وزیرداخلہ محسن نقوی پارے کہ غٹ ذیلی ادارہ غاتا نیام اٹ تین پہ تینی کمکاری بے کچ المی ءِ، غٹ ادارہ غاک اسہ ایلو نا کاریم نا کچ آن پبی فائدہ ہرفر و الس نا زند آتیٹی آسانی ودی کیر۔ محسن نقوی پارے کہ انفارمیشن و ڈیٹا نا وخت آ ہل و تس بے کچ اہم ءِ، چندی ادارہ غاتا پیشن نا ملک سفارت خانہ غاتیٹی تعینات آفیسر آک وزارت نا ایلو ادارہ غاتے ہم کمک فراوان کننگ کیرہ۔ محسن نقوی پارے کہ غٹ ادارہ غاتا افرادی قوت آن پبی فائدہ ہرفوئی مریک۔ تین پہ تینی کوآرڈینیشن گچین مننگ آن الس تون حکومت ءِ ہم فائدہ رسینگک۔ وزیرداخلہ محسن نقوی پارت کرے کہ ہیلکاری کورس آتیٹی بیرہ میرٹ آ پورو سلوک آ آفیسر آتے پندار کننگے تانکہ تعلقدار آفیسر آتا کاریم نا کچ اٹی ودکی مرے۔ وزیرداخلہ محسن نقوی غٹ ادارہ غاتے دا چرجوئی ٹی تینا سلاہ و سوج آتے پیش کننگ ناپارت کرے۔ دیوان ءِ پاننگاکہ بنجائی سیکرٹری داخلہ سلاہ وسوج آتا رداٹ جوان ءُ پلان اس مرتب کیک۔ دیوان اٹی وزیر مملکت داخلہ طلال چوہدری، سیکرٹری داخلہ، ایڈیشنل سیکرٹریز، نادرا، اینٹی نارکوٹکس کنٹرول، ایف آئی اے ، فرنٹیئر کور، فرنٹیئر کانسٹیبلری ، رینجرز، نیشنل پولیس اکیڈمی، نیشنل پولیس بیورو، پاسپورٹ اینڈ امیگریشن ، نیشنل سائبر کرائم انویسٹی گیشن ایجنسی و اسلام آباد پولیس نا سروک آک دیوان اٹی بشخ ہلکر۔
