اسلام آباد۔11جون (اے پی پی):اسلام آباد ءَ راجی ورثہ ءُ دود ءُ ربیدگ ءِ وفاقی وزیر اورنگزیب خان کھچی ءَ گوں وانگ ءُ زانگ ءُ پیشہ وارانہ تربیت ءِ وزیر مملکت وجیہہ قمر ءَ گند ءُ نند کت۔ گند ءُ نند ءِ مول ءُ مراد پاکستان ءِ مزنیں دود ءُ ربیدگی ورثہ ءُ دود ءُ ربیدگی ارزشت آناں وانگ ءُ زانگ ءِ نظام ءِ تہ ءَ جوانیں رنگ ءَ ھوار کنگ ءِ واستہ وت مہ وتی کمک ءَ را گیش کنگ بوتگ۔ گند ءُ نند ءِ ساھت ءَ دوئیں وزارت آنی نیام ءَ یکجائی گامگیج آنی سر ءَ سرجمیں رنگ ءَ گپ ءُ تران کنگ بوت کہ ایشی ءِ وسیلگ ءَ ملک ءِ وانگ ءُ زانگ ءِ نصاب ءَ دود ءُ ربیدگ ءِ سرھال آناں ھوار کنگ ءَ چہ نودربر آنی تہ ءَ راجی پجار، راجدپتر ءُ دود ءُ ربیدگ آنی گوما گہتریں سیادی جوڑ کنگ بوت کنت۔ پاکستان ءِ دود ءُ ربیدگ ءِ میراث سک باز جتائیں ءُ شاندار اِنت کہ ایشی ءَ را نوکیں نسل ءَ را سر کنگ مئے راجی ذمہ واری اِنت۔ آئی ءَ گوشت کہ وانگ ءُ زانگ ایوک ءَ کتابی زانگ ءَ گوں بندوک مہ بیت، بلکیں وانگ ءُ زانگ ءَ گوں وتی تہذیب، راجدپتر ءُ دود ءُ ربیدگ ءَ گوں ھمگرنچ کنگ بہ بیت۔ مئے لوٹ اِنت کہ نودربر پاکستان ءِ پجار ءَ سرپد بہ بنت ءُ پھر بہ کن اَنت۔ گند ءُ نند ءَ تران کنان ءَ وفاقی وزیر دود ءُ ربیدگ ءُ راجی میراث اورنگزیب خان کھیچی ءَ گوشت کہ دود ءُ ربیدگ کجام ھم راج ءِ جند انت ءُ وھدے ما ایشی ءَ گوں وانگ ءُ زانگ ءَ یکجا کن ایں گڈا ما یک شعور ءُ مول ءُ مراد ءُ مھکمیں راج ءِ بُن ھشت ایر کن ایں ۔ مئے وزارت ھرچ وڑیں کمک ءِ واستہ تیار اِنت تانکہ راجی ورثہ ءُ دود ءُ ربیدگ ءِ ارزشت آناں وانگ ءُ زانگ ءِ ادارگ آنی تہ ءَ جوانیں رنگ ءَ ھوار کنگ بہ بیت۔ دوئیں وزیراں اے گپ ءِ سرا تپاک کتگ۔ اے گامگیج آنی سر ءَ عمل کنگ ءِ واستہ سفارش جوڑ کنگ ءُ جتا جتائیں نصابی ءُ غیر نصابی کار آنی وسیلگ ءَ نودربر آناں پاکستان ءِ دود ءُ ربیدگی پجار ءِ آشنا کنگ ءِ واستہ یکجائی کارگس جوڑ کنگ بیت۔ اے کمک ءَ چہ نہ ایوک ءَ راجی پجار ءَ را پدر کنگ بیت بلکیں ورنا آناں یک مھکمیں، یکجاھیں ءُ وت مہ وتی راج ءِ بھر بوھگ ءِ واستہ ھم تیار کنت۔
