اسلام آباد۔ 10جون (اے پی پی) بنجائی وزیر حوالکاری و شینکاری عطاء اللہ تارڑ پارینے کہ بروک آ مالی سال انا بجٹ گچین و الس دوست ءُ بجٹ اس مریک، وزیراعظم شہباز شریف مدام ریلیف تننگ نا ہیت ءِ کرینے، کبینی ٹی پیدوار کمتی و جم شونداری ٹی نمان ودکی مسنے۔ سے شنبے نادے آ پارلیمنٹ ہاؤس اٹی میڈیا تون گپ وتران کرسا بنجائی وزیر حوالکاری پارے کہ بروک آ مالی سال انا بجٹ گچین و الس دوست مریک، وزیراعظم شہباز شریف مدام ریلیف تننگ نا ہیت ءِ کرینے، اوہرا قول ءِ کیک اودے پورو کیک، اونا کماشی ٹی ملک زرگزرانی تنکی آن پیش تمسا سوگوی نا کنڈآ ہِننگ ءِ۔ اسہ سوج اسے نا ورندی ٹی اوپارے کہ اپوزیشن بھارتی جارحیت نا وخت آ گچین ءُ کڑد اس ادا کرے ولے اوفتا تدوک آ دے انا پریس کانفرنس مایوس کن ئس، اپوزیشن تون زرگزرانی بابت ہچ ءُ پبی حساب وکتاب اس الوکہ، اوفتے بایدے مروسس کہ تیاری کروسر، اوفتے تون بجٹ آ تنقید کننگ کن ہچ ءُ ہیت اس الوکہ، ہنداسوب آن وڑوڑنا بہانہ پٹنگ ءُ۔ اسہ سوج اسے نا ورندی ٹی بنجائی وزیر حوالکاری پارے کہ پاکستان ڈیفالٹ نا دنگ آن پیش تمسا زرگزرانی شونداری نا کنڈآہنانے، دااپوزیشن نا مخلوق آک ہی ئسر ہرا پاکستان نا ڈیفالٹ مننگ نا شڑت آتے خلکرہ، اللہ تعالیٰ پاکستان ءِ عزت تسنے، پاکستان اٹ کبینی ٹی کمتی مس و جم شونداری ٹی ودکی مسنے۔ اسہ پین سوج اسے نا ورندی ٹی اوپارے کہ وزیراعظم جوان ءُ قول کرساکرینے، اوڑآن جوان ءُ اومیت بایدے تخنگے۔
