اسلام آباد۔ 10جون (اے پی پی) وزارت داخلہ پارینے کہ غیرکانودی درملکی تے وطن آ پدی ناپروگرام (آئی ایف آرپی) نا رداٹ غٹ غیرکانودی درملکی تے اوفتا ملک آتیا گدریفنگ انگ ءِ، اوغان شاری تتون اوار غٹ غیرکانودی درملکی تے اسہ وار ولدا معلومدار کننگک کہ او منشاکارانہ وڑاٹ ملک ءِ ہلر۔ وزارت داخلہ نا کنڈآن جاری بیان اٹی ترجمان پارے کہ غیرکانودی درملکی تتون اوار اوار اوغان سٹیزن کارڈ ہولڈر آتا وطن آ واپسی نا بنایکم اپریل 2025آن مس و بناآن داتم اسکان 216،103غیرکانودی درملکی تے پدی گدریفنگ انگ ءِ و دا مہم برجاءِ۔ وزارت داخلہ نا ترجمان پارے کہ اکتوبر 2023ء آن غیرکانودی درملکی تا وطن آ واپسی نا پروگرام نا رداٹ داتم اسکان 1،102،441غیرکانودی درملکی تے پدی گدریفنگانے، اوغان شاری تتون اوار غٹ غیرکانودی درملکی تے اسہ وار ولدا معلومدار کننگک کہ او منشاکارانہ وڑاٹ ملک ءِ ہلر۔ ترجمان وزارت داخلہ پارے کہ تینا ملک آتیا پدی ہنوک آ خاص کر زالبول، چناو بزرگ آتون باعزت برتاؤ ءِ پک کننگ انگ ءِ، پدی ہنوک آ درملکی تیکن خور و جان جوڑی نا چیٹ انا بست وبند آک ہم ساڑی ءُ۔ ترجمان وزارت داخلہ پارے کہ ہمو زموار آک ہراوطن آ پدی ہِننگ نا عمل اٹ اڑاند ودی کننگ ءُ یا ہموفک ہرا غیرکانودی درملکی تا ملازمت اٹی ودکی، کِراغاجاگہ و ہوٹل آتیٹی ہنکین فراوان کننگ یا اوفتے تون کاروبار کننگ اٹ اوار خننگا، اوفتے تون کانود نا رداٹ سختی اٹ مون تننگک۔
