گچین حج بست وبند آتیا سعودی وزارت حج و عمرہ نا ایکسی لینسی ایوارڈ پاکستان کن اعزاز اسے، بنجائی وزیر سردار محمد یوسف

مکہ مکرمہ۔ 10جون (اے پی پی) مذہبی امور نا بنجائی وزیر سردار محمد یوسف پارینے کہ حج 2025 مستین نا حج انا مقابلہ ٹی اسہ تاریخی و گچین ءُ حج اس مسنے ہراٹی پاکستانی حاجی تے بھلو خذمت و آسراتی فراوان کننگا، گچین حج بست وبند آتیا سعودی وزارت حج وعمرہ نا ایکسی لینس ایوارڈ پاکستان کن اعزاز اسے۔ سے شنبے نادے آ داڑے پوسٹ حج پریس کانفرنس آن تران کرسا سردار محمد یوسف پارے  حج آ پاکستانی حاجی تے مبارکباد پیش کرساپارے کہ وزیراعظم محمد شہباز شریف نا کماشی و خصوصی است خواہی نا سوب حاجی تا دا سفر روحانی تسکین نا سوب ئس۔ نن بست وبند آتیا کمکاری کن خادم الحرمین الشریفین، شاہ سلمان بن عبدالعزیز ، ولی عہد شہزادہ محمد بن سلمان، و سعودی وزارت ءِ حج و عمرہ نا منت وار اُن۔ سردار محمد یوسف پارے کہ سعودی حکومت 88 ہزار مسہ سد سرکاری حاجی تتون اوار اسہ لکھ 15 ہزار آن زیات پاکستانی حاجی تا تاریخی مہمانداری کرے۔ گچین حج بست وبند آتیا سعودی وزارت حج وعمرہ پاکستان حج مشن ءِ ایکسی لینس ایوارڈ تس و پاکستان حج مشن ایوارڈ ہلوک آ ہفت مشن تیٹی اولیکو نمبر اس بس۔ مشاعر اٹی اولیکو وار حاجی تا رہینگ انگ کن بھلو آسراتی اس فراوان کننگا، اولیکو وار حاجی تیکن منیٰ ٹی ایئرکنڈیشنڈ تمبو، جپسم بورڈ پارٹیشن، صوفہ کم بیڈز و اوورہیڈ شیلف درستی راستی کرفنگا، حاجی تیکن مسہ وخت کن و خور، اِرا سنیکس باکس، جوس، آئس کریم ، تازہ میوہ و یخ ءُ دِیر فراوان کننگا، عرفات نا  تمبو تیٹی ودکی ایئرکنڈیشنرز خلنگ، چمنی نا لان، سیخا دار راہداری تا بست وبند کننگا ، مشاعر اٹی حاجی تے ڈی کیٹگری فیس اٹی بی کیٹگری آسراتی فراوان کننگا، 56 درسد حاجی تے متکن آ منیٰ وخت اس کہ 44 درسد ءِ پوسکن آ منیٰ ٹی ہنکین تننگا، جنگ انا حالیت آتیان زہمی فلائیٹ شیڈول اٹی حاجی تے وخت آ حج مبارک آ سرکننگ کن پی آئی اے نا کمک اٹ ہلہلہ ئی حکمت عملی اس طے کننگا۔ 73 درسد حاجی تے مشاعر ٹرین نا کمک اٹ وخت اس کہ 27 درسد ءِ ایئرکنڈیشنڈ بس آتا کمک اٹ مشاعر اٹی سفر نا آسراتی تننگا۔ 88 ہزار 300 حاجی تے 16 گھنٹہ دورانیہ نا خصوصی ٹرانسپورٹ آپریشن نا کمک اٹ منیٰ غا سرکننگا۔ ’’منی موو‘‘ ٹرانسپورٹ آپریشن اٹی 1140 بس آک بشخ ہلکر۔ سردار محمد یوسف پارے کہ سرکاری اسکیم نا رداٹ پاکستانی حاجی تیکن پیکج نا نہاد ڈیہہ انا ایلو ملک آتیان کم و آسراتی تیٹی زیات گچین ئس، مدینہ منورہ ٹی دا سال غٹ پاکستانی حاجی تے مسجد ءِ نبوی صلی اللہ علیہ و آلہ وسلم آن خڑک انگا تھری و فائیو اسٹار ہوٹل آتیٹی ہنکین تننگا، مدینہ منورہ ٹی سد درسد حاجی تے ریاض الجنہ نا زیارت ہم کرفنگا۔ کن وخور انا فراوانی کن مکہ معظمہ ٹی 22 و مدینہ منورہ ٹی 13 کیٹرنگ کمپنی تے مسابقتی عمل نا رداٹ گچین کننگا، پاکستانی حاجی تے اوفتا وڑانا کن وخور فراوان کننگ کن پاکستانی شیف و باورچی تا خذمت دوئی کننگا، اولیکو وار ’’ناظم اسکیم‘‘ درستی راستی کرفنگا، ہرانا رداٹ ہر88 حاجی نا گروپ آ اسہ ناظم اس تعینات کننگا، حاجی تے طبی آسراتی فراوان کننگ کن ڈاکٹر و پیرامیڈیکل اسٹاف آ تالان چارسد چاہندار آتا خذمت دوئی کننگا۔ سردار محمد یوسف مناسک حج اٹی سعودی رغاموک آتیا عمل کننگ آ پاکستانی حاجی تا منت واری ءِ ہرفے۔