لاہور۔9جون (اے پی پی): مزن وزیر محمد شہباز شریف ءَ ائید ءِ روچ سک شلوار گوازینگ ءِ وھد ءَ بازیں اسلامی ملک آنی سروک ءُ راجی سیاسی سروک آنی گوما فون ءِ سر ءَ گپ ءُ تران کت ءُ ائید ءِ موہ ءَ آھاں مبارک بات دات۔ مزن وزیر شہباز شریف ءَ شمبے ءِ روچ ءَ ماڈل ٹاؤن لاہور ءَ ائید الاضحٰی ءِ نماز وانگ ءَ ات ءُ ایشی ءَ پد ملائیشیا، ترکی، تاجکستان، آذربائیجان، مصر، کویت، اردن، ازبکستان، بحرین، ایران، عمان ءُ قازقستان ءَ ھوار مسلمانیں ملک آنی سروک آناں ائید ءِ مبارکی دات۔ حالی پاکستان ءُ ہندوستان ءِ بحران ءِ سبب ءَ بوتگ۔ مزن وزیر ءَ صدر آصف علی زرداری، گورنر، سر وزیر، اسپیکر راجی اسمبلی، وفاقی وزیر ءُ راجی سیاسی رہشون آں گوں ھم ٹیلی فون کتگ ءُ عید ءِ مبارکی ءُ نیکیں واھگ آنی درشان کتگ۔ مزن وزیر ءِ ھواری ءَ پنجاب ءِ پیسریگیں سر وزیر حمزہ شہباز ءُ سلمان شہباز ءَ ھم ائید ءِ نماز ونت۔ دعا ءِ وانگ ءَ پد مزن وزیر ءَ الس ءَ را سلام ءُ دروت کت۔ مزن وزیر کارگس ءِ پریس ونگ ءِ نیمگ ءَ جاڑی بوتگیں پریس ریلیز ءِ رد ءَ مزن وزیر محمد شہباز شریف ءَ ائید ءِ موہ ءَ ملائیشیا ءِ مزن وزیر داتو سری انور ابراہیم ءَ گوں گپ ءُ تران کتگ۔ دوئیں بامرد آں عید ءِ نیکیں موہ ءَ سلام ءُ دروت ھم کت۔ ایشاں مسلمان امت ءِ تپاکی ءُ وشھالی ءِ واستہ دعا کتگ ۔ دوئیں راہشوناں غزہ ءَ امن ءُ بے گناہیں فلسطینی آنی رکھینگ ءِ واستہ ھم دعا کتگ۔ محمد شہباز شریف ءَ پاکستان ءُ بھارت ءِ نیام ءَ گوستگیں کش ءُ چیل ءِ وھد ءَ ملائیشیا ءِ کمک ءُ متوازن موقف ءِ ھاتر ءَ دل ءِ جہلانکی ءَ منت گپتگ ءُ ڈی اسکالیشن ءُ گپ ءُ تران ءِ ضلورت ءِ سر ءَ ھم زور پر داتگ۔ آئی ءَ 4 مئی 2025 ءَ ملائیشیا ءِ مزن وزیر ءَ گوں وتی ٹیلی فون ءِ گپ ءُ تران ءِ ھم ھاسیں ذکر کتگ کہ اے وھد ءَ کش ءُ گور ءِ ھال ءُ اھوال بوتگ۔ مزن وزیر محمد شہباز شریف ءَ اے گپ ءِ سر ءَ زور پر دات کہ پاکستان ءَ مدام دمگی امن ءُ ایمنی ءِ واستہ کوشست کتگ، بلے مئے کرّا بے گناہیں پاکستانی آنی سر ءَ بھارت ءِ فوجی زوراکی ءِ سر ءَ ترند ءُ فیصلہ کنوکیں پسو دیگ ءَ ابید دگہ راہ نیست اَت پرچا کہ بھارت ءَ پاکستان ءِ وت واجہی ءُ سرزمین ءِ یکوئی ءِ ھلاپ ورزی کتگ۔ دوئیں مزن وزیر آں پاکستان ءُ ملائیشیا ءِ سیادی ءِ سر ءَ ھم گپ ءُ تران کت ءُ تجارت، سرمایہ کاری ءُ دود ءُ ربیدگ ءَ ھوار بازیں شوبگ آنی تہ ءَ دو نیمگی کمک ءَ را مھکم کنگ ءِ واستہ وتی جزم ءِ پدا پدر کت۔ مزن وزیر محمد شہباز شریف ءَ ٹیلی فون گپ ءُ تران ءِ وھد ءَ تاجکستان ءِ صدر ایموملی رحمون ءَ گوں فون کتگ۔ ءُ تاجکستان ءِ براتیں اُلس ءَ را ائید ءِ روچ ءَ مبارک بات دات۔ مزن وزیر محمد شہباز شریف ءَ گوستگیں پاک ءُ ہندوستان ءِ جیڈھ ءِ وھد ءَ امن ءُ گپ ءُ تران ءِ واستہ تاجکستان ءِ متوازن موقف ءِ سر ءَ منت واری ءِ درشانی کنان ءَ اے گپ ءِ سر ءَ زور پر دات کہ پاکستان ءَ مدام دمگ ءَ امن ءُ ایمنی ءِ برجائی ءِ کوشست کتگ ءُ ھمے جذبہ ءِ تہ ءَ پاکستان ءَ گوں امریکی دوستیں میڈیا ءِ گوما جنگ بندی ءِ سر ءَ تپاک کتگ۔ دوئیں رہشون آں دو نیمگی سیادی آنی تہ ءَ وت مہ وتی دلچسپی ءِ درستیں پڑ آنی تہ ءَ کم کم ءَ سیادی ءِ دیمروئی ءِ جوانیں رپک ءِ سر ءَ دل یکیمی ءِ درشانی کت۔ مزن وزیر محمد شہباز شریف ءَ عید ءِ وشیں موہ ءِ سر ءَ آذربائیجان ءِ صدر الہام علیف ءِ گوما ٹیلی فون ءِ سر ءَ گپ ءُ تران ءِ ساھت ءَ آئی ، آئی ءِ کھول ءُ آذربائیجان ءِ براتیں راج ءَ را ائید ءِ مبارک بات دات۔ مزن وزیر محمد شہباز شریف ءَ یک رندے پدا پاک ءُ بھارت ءِ جیڈھ ءِ وھد ءَ آذربائیجان ءِ نیمگ ءَ پاکستان ءِ بے مٹیں کمک ءِ سر ءَ یک رندے پد ءَ منت واری ءِ درشان کت ءُ گوشت کہ اے دوئیں ملک آنی نیام ءَ مھکمیں براتی ءِ گواہ اِنت۔ دوئیں رہشون آں پاکستان ءُ آذربائیجان ءِ نیام ءَ دو نیمگی کمک ءَ را گیش مھکم کنگ ءِ واستہ وتی یکجائی عزم ءِ سر ءَ زور پر دات۔ مزن وزیر محمد شہباز شریف ءَ مصر ءِ صدر عبدالفتاح السیسی ءَ را ٹیلی فون کتگ ءُ آئی ءَ را ائید ءِ روچ ءَ مبارک بات داتگ۔ مزن وزیر ءَ گوستگیں وھد ءَ پاکستان ءُ بھارت ءِ جیڈھ ءِ وھد ءَ امن ءِ واستہ مصر ءِ جوڑیشت ءِ کرد ءُ کوشست آناں ساڑات۔ میاں اوستمانی جاورانی سرا ہم گپ ءُ تران کنگ بوت۔ آئی ءَ یک رندے پدا گوشت کہ پاکستان تجارت، سرمایہ کاری ءُ جان سلامتی ءَ ھوار بازیں شوبگ آنی تہ ءَ مصر ءِ گوما دو نیمگی کمک ءَ را گیش کنگ ءِ واھشت مند اِنت۔ مصر ءِ صدر ءَ مزن وزیر ءِ عید الاضحٰی ءِ مبارکی آنی سر ءَ گرمیں رنگ ءَ پسو دات۔ مزن وزیر محمد شہباز شریف ءَ عید الاضحٰی ءِ موہ ءَ کویت ءِ ولی عہد شیخ صباح الخالد الحمد مبارک الصباح ءَ گوں ٹیلی فون ءِ وسیلگ ءَ رابطہ کت ءُ عید ءِ مبارکی آناں سر کت ءُ دو نیمگی اقتصادی، سرمایہ کاری ءُ تجارتی کمک ءَ را گیش گیش کنگ ءِ ضلورت ءِ سر ءَ زور پر دات۔ اے موہ ءِ سر ءَ دوئیں سروک آں مسلمان امت ءِ ایمنی ءُ وشھالی ءِ واستہ دعا کتگ ۔ مزن وزیر ءَ پاکستان ءُ بھارت ءِ نیام ءَ گوستگیں کش ءُ چیل ءِ وھد ءَ امن ءُ گپ ءُ تران ءِ کمک ءِ واستہ کویت ءِ ولی عہد ءِ شگر ءُ منت گپت۔ آئی ءَ اے گپ ءِ سر ءَ زور پر دات کہ پاکستان مدام خطہ ءَ ایمنی ءِ واھشت داریت۔ مزن وزیر ءَ دو نیمگی اقتصادی، سرمایہ کاری ءُ تجارتی کمک ءَ را گیش ودائینگ ءِ ضلورت ءِ سر ءَ زور پر دات۔ آئی ءَ ھاسیں رنگ ءَ کویت ءِ منت گپت کہ آئی ءَ پاکستانی شہری آنی واستہ ویزا ءِ لوٹ آناں آسانی کتگ ایشی ءَ چہ کویت ءَ را ہنرمندیں مردمی قوت درآمد کنگ ءِ گوما مردم آنی نیام ءَ سیادی ءَ را گیش کنگ ءَ کمک رسیت۔ صباح الخالد الحمد المبارک الصباح ءَ مزن وزیر ءِ ائید ءِ مبارکی آنی سر ءَ گرمیں رنگ ءَ پسو دات ءُ پاکستانی الس ءَ را وتی نیکیں واھگ آنی درشان کت۔ مزن وزیر محمد شہباز شریف ءُ اردن ءِ بادشاہ عبداللہ دوم بن الحسین ءَ فون ءِ سر ءَ ائید ءِ مبارکی داتگ۔ دوئیں رہشونانی نیام ءَ گوستگیں روچ ءَ پاکستان ءُ ہندوستان ءِ جیڑہ ءِ بابت ءَ ہم گپ ءُ تران بوتگ۔ ایشاں غزہ ءِ برجاھیں جاور ھال آنی سر ءَ ھم گپ ءُ تران کت ھاسیں رنگ ءَ فلسطینی اُلس ءَ را انسانی کمک ءِ پھجاری ءِ ھاترا کوشست آنی سر ءَ ھم گپ ءُ تران کت۔ مزن وزیر محمد شہباز شریف ءَ گوں ازبکستان ءِ صدر شوکت میرزیویف ءَ فون ءِ سر ءَ گپ ءُ تران کت۔ مزن وزیر ءَ ازبکستان ءِ صدر ءِ ھواری ءَ ازبکستان ءِ الس آناں عید الاضحٰی ءِ موہ ءَ مبارکی دات ءُ امت ءِ جان سلامتی ءُ وشھالی ءِ واستہ دعا کت۔ دوئیں رہشوناں دو نیمگی سیادی ءِ جوانیں رپک ءِ سر ءَ دل یکیمی ءِ درشانی کت ءُ دمگی رابطہ کاری ءَ ھوار درستیں پڑ آنی تہ ءَ کمک ءَ را گیش کنگ ءِ واستہ وتی یکجائی عزم ءِ پدرائی کت کہ اے دوئیں ملک آنی واستہ اولی ترجی اِنت۔ مزن وزیر محمد شہباز شریف ءَ ٹیلی فون ءِ وسیلگ ءَ بحرین ءِ شاہ حمد بن عیسیٰ الخلیفہ ءَ گوں رابطہ کتگ ءُ ائید ءِ موہ ءَ بحرین ءِ سروکی ءُ الس ءَ را سلام ءُ نیکیں واھگ سر کتگ انت۔ وتی گپ ءُ تران ءِ ساھت ءَ دوئیں راہشوناں امت ءِ نیام ءَ امن ءُ تپاکی ءِ دعا کتگ ءُ غزہ ءِ مہلوک ءِ واستہ حاصیں دعا کتگ ۔ مزن وزیر ءَ گوشت کہ پاکستان ءُ بحرین ءِ نیام ءَ نزیکیں برات ءِ سیادی است انت ایشی ءِ تہ ءَ دوئیں ملک آنی نیام ءَ دو نیمگی کمک ءَ را گیش گیش ءُ گیوار کنگ ءِ بے دروریں گنجائش است انت۔ مزن وزیر محمد شہباز شریف ءَ ٹیلی فون ءِ وسیلگ ءَ جمہوریہ اسلامی ایران ءِ صدر ڈاکٹر مسعود پزیشکیان ءَ گوں رابطہ کتگ ءُ آئی ءَ را ءُ ایرانی اُلس ءَ را ائید ءِ موہ ءَ مبارک بات داتگ۔ آئی ءَ ایران ءِ سروک آیت اللہ علی خامنہ ای ءِ ھم نیکیں واھگ آنی درشانی کتگ۔ مزن وزیر ءَ وتی گوستگیں تہران ءِ تر ءُ تاب ءِ یات ءَ کنان ءَ پاکستان ءِ واھشت ءِ سر ءَ زور پر دات کہ آ وت مہ وتی مفاد ءِ شوبگ آنی تہ ءَ ایران ءِ گوما وتی سیادی ءَ را گیش مھکم بہ کنت۔ دوئیں رہشوناں دمگی ءُ جھان ءِ دیمروئی آنی سر ءَ ھم گپ ءُ تران کت، ایشی ءِ تہ ءَ گوستگیں ھند ءُ پاک ءِ جیڈھ ءِ ھوار غزہ ءِ جیڑھ ءِ سر ءَ ھم گپ ءُ تران کت۔ مزن وزیر محمد شہباز شریف ءَ ٹیلی فون ءِ وسیلگ ءَ سلطنت عمان ءِ سلطان حیثم بن طارق السعید ءَ گوں رابطہ کتگ ءُ سلطان حیثم ءُ عمان ءِ براتیں اُلس ءَ را ائید ءِ سلام سر کتگ۔ مزن وزیر ءَ پاکستان ءُ بھارت ءِ نیام ءَ گوستگیں جیڈھ ءِ وھد ءَ عمان ءِ موقف ءِ سر ءَ سلطان ءِ منت واری ءِ درشان کت ءُ ڈی اسکالیشن ءُ گپ ءُ تران ءِ واستہ آئی ءِ کمک ءَ را ساڑات۔ مزن وزیر محمد شہباز شریف ءَ جمہوریہ ترکی ءِ صدر رجب طیب اردوان ءَ گوں ٹیلی فون ءِ وسیلگ ءَ رابطہ کت ءُ عید ءِ نیکیں موہ ءَ آئی ءُ ترکی ءِ براتیں اُلس ءَ را ائید ءِ مبارک ءُ نیکیں واھگ سر کت۔ مزن وزیر ءَ استنبول ءُ لاچین ءِ گوستگیں تر ءُ تاب ءِ ساھت ءَ برجم داشتگیں گند ءُ نند آنی حوالہ ءَ مزن وزیر ءَ یک رندے پدا پاکستان ءُ بھارت جیڈھ ءِ وھد ءَ ترکی ءِ نیمگ ءَ پاکستان ءِ مھکمیں ءُ بے دروریں کمک ءِ سر ءَ صدر اردوان ءِ شگر ءُ منت گپت۔ اے اشارہ ءَ پاکستانی دل گپت انت ءُ پاک ترکی براتی ءِ راجدپتر ءِ تہا دگہ شانداریں بابے گیش کت۔ دوئیں رہشون آں وتی گوستگیں گند ءُ نند آنی ساھت ءَ کتگیں ھاسیں پیسلہ آنی سر ءَ عملدرآمد ءَ را ترند کنگ ءِ سر ءَ ھم تپاک کتگ۔ مزن وزیر محمد شہباز شریف ءَ جمہوریہ کزاکستان ءِ صدر کسیم جومارت توکایف ءَ گوں ٹیلی فون ءِ سر ءَ گپ ءُ تران کت ءُ عید ءِ موہ ءَ آئی ءَ را ءُ کزاکستان ءِ براتیں اُلس ءَ را سلام ءُ دروت سر کت۔ دوئیں رہشون آں دو نیمگی سیادی ءِ استیں جاور ھال ءِ ھوار آیوکیں ھواریں کار آنی سر ءَ ھم تران کت۔ دو نیمگی سیادی آنی تہ ءَ جوانیں رپک ءِ سر ءَ وشھالی ءِ درشان کنان ءَ دوئیں رہشون آناں دوئیں ملک آنی نیام ءَ کمک ءَ را وتی صلاحیت آنی سرجمیں کساس ءَ را گیش کنگ ءِ واستہ وتی عزم ءِ یک رندے پدا گوشت۔ گوستگیں پاکستان ءُ بھارت ءِ جیڈھ ءِ سر ءَ ھم گپ ءُ تران کنگ بوت ءُ آھاں دمگ ءَ امن ءُ ایمنی ءِ برجائی ءِ واستہ پاکستان ءِ کوشست آنی بابت ءَ صدر ءَ را سرپد کت۔ دومی نیمگ ءَ مزن وزیر محمد شہباز شریف ءَ صدر آصف علی زرداری ءَ گوں ٹیلی فون کتگ ءُ ائید ءِ موہ ءَ وتی سلام ءُ دروت سر کتگ انت۔ صدر آصف زرداری ءَ مزن وزیر ءِ شگر ءُ منت گپت ءُ مزن وزیر ءِ واستہ نیکیں واھگ آنی درشان کت۔ دوئیں رھشون آں سرجمیں سیاسی جاورھال ءُ جتاجتائیں ملکی جیڈھانی سر ءَ گپ ءُ تران کُت۔ مزن وزیر محمد شہباز شریف ءَ عید ءِ موہ ءَ پنجاب ءِ گورنر سردار سلیم حیدر خان، خیبر پختونخوا ءِ گورنر فیصل کریم کندی ءُ بلوچستان ءِ گورنر جعفر خان مندوخیل ءَ گوں ٹیلی فون ءِ وسیلگ ءَ رابطہ کتگ ءُ گورنر آناں سلام ءُ دروت درشان کتگ۔ راہشون آں مزن وزیر ءِ شگر ءُ منت گپت ءُ مزن وزیر ءَ را عید الاضحٰی ءِ روچ ءَ مبارک بات دات ءُ مزن وزیر ءِ واستہ نیکیں واھگ آنی درشان کت۔ مزن وزیر محمد شہباز شریف ءَ ھم ٹیلی فون ءِ وسیلگ ءَ پنجاب ءِ سر وزیر مریم نواز، سندھ ءِ سر وزیر سید مراد علی شاہ، خیبر پختونخوا ءِ سر وزیر علی امین گندپور ءُ بلوچستان ءِ سر وزیر میر سرفراز بگٹی ءَ گوں رابطہ کتگ ءُ آھاں عید الاذہ ءِ مبارکی داتگ۔ ٹیلی فون گپ ءُ تران ءِ ساھت ءَ توامیں بنجاھی وزیر آں مزن وزیر ءِ شگر ءُ منت گپت ءُ مزن وزیر ءَ را ائید ءِ روچ ءَ ھم مبارکی دات۔ بنجاھی وزیر آں مزن وزیر ءِ واستہ نیکیں واھگ آنی درشان کت۔ مزن وزیر محمد شہباز شریف ءَ عید الاضحٰی ءِ موہ ءَ راجی اسمبلی ءِ اسپیکر سردار ایاز صادق، راجی وانگ ءُ زانگ ءِ وفاقی وزیر ڈاکٹر خالد مقبول صدیقی ءُ مواصلات ءِ وفاقی وزیر عبدالعلیم خان ءَ را ٹیلی فون کتگ ءُ عید الاضحٰی ءِ موہ ءَ سیاسی رہشون آناں مبارکی داتگ۔ توامیں بادشاہ آں مزن وزیر ءِ شگر ءُ منت گپت ءُ مزن وزیر ءَ را ائید الاضحٰی ءِ مبارکی دات ءُ وتی نیکیں واھشتانی ھم درشان کت۔ مزن وزیر محمد شہباز شریف ءَ ٹیلی فون ءِ وسیلگ ءَ جامعت علماء اسلام ءِ سروک مولانا فضل الرحمن، امیر جامعت اسلامی حافظ نعیم الرحمن، جامعت علماء پاکستان ءِ سیکرٹری جنرل شاہ عویس وطن پرانی ءَ گوں رابطہ کتگ۔ ءُ آھاں عید الاضحٰی ءِ مبارک بات دات ءُ وتی نیکیں واھگ آنی درشان کت۔ ایشانی تہا ملک ءِ سرجمیں سیاسی جاورحالانی سرا ہم گپ ءُ تران بوتگ۔ مزن وزیر محمد شہباز شریف ءَ اوورسیز پاکستانی ءُ انسانی وسائل ءِ دیمروئی ءِ وفاقی وزیر چوہدری سالق حسین ءَ گوں ھم ٹیلی فون ءِ وسیلگ ءَ رابطہ کتگ ءُ آئی ءَ را عید الاضحٰی ءِ مبارکی داتگ۔ مزن وزیر ءَ پاکستان مسلم لیگ کیو ءِ صدر چوہدری شجات حسین ءِ جان سلامتی ءِ بابت ءَ جست ءُ پرس کت۔ آئی ءَ چوہدری شجات ءِ جان سلامتی ءِ دعا کتگ ءُ آئی ءِ ھاتر ءَ وتی نیکیں واھگ ءِ درشانی کتگ۔ وفاقی وزیر چوہدری سالک حسین ءَ ھم مزن وزیر ءَ را عید الاضحٰی ءِ مبارک بات داتگ۔
