اسلام آباد۔ 05جون (اے پی پی) چیئرمین سینیٹ سید یوسف رضاگیلانی وقوفہ عرفہ نا باسعادت موقع غا مناسک حج انا اہم رکن ءِ ادا کننگ آ غٹ حاجی و امت مسلمہ ءِ خصوصی مبارکبادی تسنے۔ سینیٹ سیکرٹریٹ نا کنڈآن جاری بیان نا رداٹ چیئرمین سینیٹ سید یوسف رضاگیلانی تینا تہنیتی کلہو اٹی پارے کہ دابابرکت دے ہر مسلمان قول کیک کہ ذات باری تعالیٰ نا پرمان تا بجاآوری کن او ہرقربانی ءِ تننگ کن تیار ءِ، قربانی نا جوزہ دا قول انا ہم تائید ءِ ہرانا حضرت ابراہیم علیہ السلام پڑو کریسس۔ اوپارے کہ حج اسلام نا اہم انگا رکن ءِ و ننے مرے کہ قرآن و سنت نا امن، اخوت و ایلمی نا کلہو ءِ انسانیت اٹ لس کین، امت مسلمہ ءِ داوخت آ غٹ آن زیات سیوت نا گرج ءِ۔ اوپارے کہ حج ننے بریبری، سیوت و اخوت نا درس ایتک، مچ آ دنیا غان بروک آ لکھ آ مسلمان، رنگ نسل، بولی و قومیت آن ایڑترمرسا اسہ لویس اٹی ، اسہ رب انا حضور، اسہ ہی وڑاٹ سجدہ زیر مریرہ، دا منظر اسلامی امت نا وحدت ءِ ملی و روحانی یکجہتی نا گچین ءُ درور اسے۔ سید یوسف رضاگیلانی پارے کہ ہمو غٹ خوش نصیب حاجی تے است انا حب اٹ مبارکبادی ایتیوہ ہرافک داسال بیت اللہ نا زیارت و مناسک ءِ حج ادا کننگ نا شرف دوئی مننگ ءِ، دا اوفتا زند انا غٹ آن بابرکت و روح پرور لمحہ ءِ۔ اودعاکرے کہ اللہ تعالیٰ اوفتا عبادت، دُعا و قربانی تے تینا بارگاہ ٹی قبول کے و حاجیک تینا است آتیٹی سکون، برکت و تقویٰ نا سرمایہ ءِ ہرفسا وطن آ پدی بریر، اوفتا حاضری، نئے بیرہ اوفتے کن بلکن مچ آملک و امت مسلمہ کن خیروبرکت نا ذریعہ جوڑمرے۔
