اسلام آباد۔ 05جون (اے پی پی) اسپیکر قومی اسمبلی سردار ایاز صادق یوم عرفہ غا حاجی تے مبارکبادی ترساپارینے کہ حج انا فرض اللہ تعالیٰ نا خاص ءُ انعام اسے ہرا مچ آ دنیا نا مسلمان تے اسہ جاگہ غا مچ مننگ نا موقع اس فراوان کیک۔ اسپیکر قومی اسمبلی تینا تہنیتی کلہو اٹی پارے کہ حج انا فرض یکجہتی و سیوت نا عظیم ءُ درور اسے، حج انا موقع ننے تینا صف آتیٹی سیوت و یکجہتی ودی کننگ نا کلہو ایتک، حج اسلام نا پنچ بنداوی رکن آتیان اسٹ ءِ۔ مناسکءِ حج، قربانی، صبر و اطاعت ءِ الٰہی نا یات ترفک۔ اوپارے کہ حج روحانی سفر ءِ ہرابندغ ءِ اللہ نا خڑک کیک، حج سیوت، بریبری، صبر و ایثار نا درس ایتک، حاجیک تینا خواہش آتے اللہ نا رضاکن قربان کیرہ، حضرت ابراہیم علیہ السلام نا قربانی نا سنت امت مسلمہ کن کسر نا ڈیواءِ، سنت ابراہیمی ننے تینا غٹ ءِ اللہ تعالیٰ نا کسر اٹ قربان کننگ نا درس ایتک۔ اسپیکر قومی اسمبلی حج 2025نا شاندار بست وبند آتیا سعودی حکومت ءِ مبارکبادی تس وپارے کہ لکھ آ حاجی تیکن آسراتی فراوان کننگ ستاکڑزک۔ اودعاکرے کہ اللہ تعالیٰ غٹ حاجی تا عبادت و قربانی تے قبول کے۔ اوپارے کہ حج انا عظیم موقع غا مسلم امہ فلسطین وکشمیر نا مظلوم مسلمان تا حالیت ءِ است آن دپس، مسلم امہ غان کشمیر و فلسطین نا مظلوم مسلمان تا آجوئی کن دعانا خواست کیوہ و حج انا وخت آ امت مسلمہ نا یکجہتی کن دعاکیوہ۔
