اسلام آباد۔ 05جون (اے پی پی) بنجائی وزیر قومی میرات و دودوربیدہ محمد اورنگزیب خان کھچی تون بنجائی وزیر آبی وسیلہ میاں محمد معین وٹو و مسکوہی بنجائی وزیر سائنس و ٹیکنالوجی چنگیز خان جمالی ئسک اوڑدہی کریر ہراٹی بلوچستان و پنجاب اٹی دِیرانا ویل و وخت آن مست نوکاپ آن بچفنگ نا گام گیج آتا بارواٹی سرجمی اٹ گپ وتران کننگا۔ وزارت قومی میرات و دودوربیدہ نا کنڈآن جاری بیان نا رداٹ اوڑدہی ٹی بنجائی وزیر میاں محمد معین وٹو داہیت آ زور شاغا کہ دِیر انا بشخنگ کن ساڑی فارمولا نا رداٹ ہر صوبہ ءِ اونا بشخ تننگک و صوبہ سے نا دِیر ءِ ایلو صوبہ غاتیا گدریفنگپک۔ بنجائی وزیر اورنگزیب خان کھچی پارے کہ دودوربیدہ ئی میرات نا رکھ اتون اوار اوار چاگڑدی رکھ ہم ننا زمواری ءِ۔ اوپارے کہ نوکاپ آن بچنگ کن پیشگی گام گیج و آبی وسیلہ غاتا گچین کاریم اٹ اتنگ وخت انا اہم گرج ءِ۔ مسکوہی بنجائی وزیر چنگیز خان جمالی پارے کہ بنجائی حکومت صوبہ غاتون اواری اٹ جوان ءُ حکمت عملی اس تیار کے تانکہ داویل آتا پائیدار ءُ ایسر اس کشنگ مرے۔ اوڑدہی ٹی ہرمسٹ آ راہشونک داہیت آامنا کریر کہ دِیر انا ویل و نوکاپ آن بچنگ کن بنجائی و صوبائی حکومت آتا نیام اٹ خڑکی کمکاری و مربوط حکمت عملی نا گرج ءِ۔ اوداعزم انا درشانی ءِ کرے کہ غٹ تعلقدار ادارہ غاتون اواری اٹ داویل آتا ایسر اس کشنگک تانکہ الس ءِ مون تروک مشکل آتے کم کننگ مرے۔
