اسلام آباد۔ 05جون (اے پی پی) بنجائی وزیر قومی میرات و دودوربیدہ اورنگزیب کھچی تون پارلیمانی سیکرٹری قومی میرات و دودوربیدہ فرح نا ز اکبر تون اوار ملالہ فنڈ انا چیف ایگزیکٹیو آفیسر نشاط ریاض وزارت نا دفتراٹی اوڑدہی کریر۔ وزارت قومی میرات و دودوربیدہ آن جاری بیان نا رداٹ اوڑدہی نا مسخت مچ آ ملک، خاص کر گلگت بلتستان اٹی دودوربیدہ ئی میرات نا رکھ، مون آدننگ و دودوربیدہ ئی چیلنج آتا بابت اسیجائی کوشست آتیا گپ وتران ئس۔ بنجائی وزیر اورنگزیب کھچی ملالہ فنڈ انا تعلیم، صنفی بریبری و دودوربیدہ ئی ہم گرنچی کن برجاگام گیج آتا ستاءِ کرے وپارے کہ پاکستان نا دودوربیدہ ئی میرات ننا قومی شناخت نا اہم تمبہ ءِ ہرانا رکھ و شونداری کن غٹ اسٹیک ہولڈر آتے اواری اٹ کاریم کروئی مریک۔ نشاط ریاض ملالہ فنڈ انا کنڈآن تعلیم و دودوربیدہ نا بشخ آتیٹی برجاڈٹ آتا سرجم آتیان معلومدار کرے و خاص وڑاٹ گلگت بلتستان اٹی زالبول و ورناتے دودوربیدہ ئی سرجزآتیٹی اوار کننگ نا اہمیت آ زورشاغا۔ اوپارے کہ ملالہ فنڈ نئے بیرہ تعلیم بلکن دودوربیدہ ئی شونداری ءِ ہم اہمیت ایتک و پاکستان نا تاریخی و دودوربیدہ ئی سرمایہ نا رکھ اکن حکومت تون شریداری عمل ءِ مون آ دننگ خوانہ۔ داوخت آ چندی سلاہ تیا سجفنگا ہرافتے ٹی ہندی دودوربیدہ غاتا دستاویزکاری، دودوربیدہ ئی میوزیم آتا جوڑ کننگ، ورنافنکار آتا سرپرستی،و دودوربیدہ ئی دودآتا اڈتننگ اوار ئس۔ ہڑتوم آ فریق آک داہیت آامنا کریر کہ آخبت اٹ تین پہ تینی کمکاری ءِ ودفنگک تانکہ دودوربیدہ ئی میرات ءِ پوسکن ا چین اسکان گدریفنگ مرے۔ بنجائی وزیر اورنگزیب کھچی ملالہ فنڈ ءِ وزارت نا پورو مخ تفی نا باوری کرفے وپارے کہ تعلیم و دودوربیدہ زیل و سُوآنبار ءُ و دا چرجوئی ٹی اسیجائی کوشست دوررس نتیجہ اس اتیک۔
