شنگھائی کمکار تنظیم نا رکنیت پاکستان کن اہمیت تخک، ایس سی او علاقائی کمکاری و باسک ملک آتا نیام اٹ تعلقداری تے مون آ دننگ نا گچین ءُ پلیٹ فارم اسے، سینیٹر محمد اورنگزیب

اسلام آباد۔ 03جون (اے پی پی) وزیرخزانہ و محصولات سینیٹر محمد اورنگزیب پارینے کہ شنگھائی کمکار تنظیم نا رکنیت پاکستان کن اہمیت تخک، ایس سی او علاقائی کمکاری و باسک ملک آتا نیام اٹ تعلقداری تے مون آ دننگ نا گچین ءُ پلیٹ فارم اسے، باسک ملک آتا نیام اٹ اسیجائی ڈٹ، ٹیکنالوجی نا گدریفنگ و لائخی تے ودفنگ نا پروگرام تا وارخواہی ودفنگ نا سلاہ ستاکڑزک۔ اوداہیت ءِ سے شنبے نادے آ چین نا دارالحکومت بیجنگ اٹی اڈ ہلوک ایس سی او باسک ملک آتا وزراء خزانہ و مرکزی بینک آتا گورنرزآتا دیوان آن ورچوئل تران اٹی پارے۔ وزیرخزانہ اہم دیوان نا مہمانداری آعوامی جمہوریہ چین نا حکومت نا منت واری ءِ ہرفے۔ وزیرخزانہ پارے کہ اونا دیوان اٹی بنفس نفیس شریک مننگ نا است خواہی ئس ولے پاکستان اٹ سالانہ بجٹ سیزن برجامننگ نا سوب بشخ ہلنگ ممکن مننگ کتو۔ وزیرخزانہ تینا تران اٹی پاکستان کن شنگھائی کمکار تنظیم نا رکنیت نا اہمیت ءِ تالان کرے و تنظیم ءِ علاقائی کمکاری و باسک ملک آتا نیام اٹ تعلقداری تے مون آ دننگ نا گچین ءُ پلیٹ فارم اس گوندا۔ اوایس سی او نا منشور و ’’شنگھائی سپرٹ‘‘ نا اصول آتا رداٹ علاقائی کمکاری ءِ مون آ دننگ نا عزم انا درشانی ءِ کرے۔ وزیرخزانہ ڈیہہ انا شونداری کن پوسکن وارخواہی تا پٹنگ اٹی ایس سی او نا سرجزآتا ستاءِ کرے و ایس سی او نا کاریم نا دنگ اٹی زرگزرانی کمکاری ءِ پین سوگو کننگ کن پاکستان نا عزم انا دُوارہ پارے۔ وزیرخزانہ تنظیم علاقائی سوگوی و شونہالی نا مون  آ دننگ اٹ نمان کڑد ادا کننگ و باسک ملک آتا نیام اٹ واپار، زرکاری و مالیاتی کمکاری ءِ مون آ دننگ اٹ ایس سی او نا کڑد انا ستاءِ کرے و باسک ملک آتا نیام اٹ اسیجائی ڈٹ ، ٹیکنالوجی نا گدریفنگ و لائخی تے ودفنگ نا پروگرام تا وارخواہی تے ودفنگ نا سلاہ نا ہم مخ تفی ءِ کرے۔ سینیٹر اورنگزیب ڈیجیٹل زرگزران و مالی شمولیت نا اہمیت نا ذکر ءِ کرے و پاکستان نا زرگزرانی شونداری و شونہالی ٹی ڈیجیٹل ٹیکنالوجی نا پبی کاریم اٹ اتنگ ءِ تالان کرے۔ وزیرخزانہ جہانی زرگزران اٹ سست روی، ودوک آ زرگزرانی ناہمواری  و چاگڑدی بدلی کون آ بھلا ویل آتا اسیجائی ایسرو باسک ملک آتیکن اسہ وڑاٹ فائدہ ئی شونداری ماڈل اس تینا کننگ آ زور شاغا۔ وزیرخزانہ زرگزرانی شونداری و علاقائی رابطہ غاتے ودفنگ اٹ انفراسٹرکچرنا شونداری ءِ تالان کرے و ڈیہہ اٹی ٹرانسپورٹ، توانائی و ڈیجیٹل رابطہ غاتے گچین کننگ نا گام گیج آتا مخ تفی ءِ کرے۔ وزیرخزانہ ایس سی او ڈویلپمنٹ بینک انا ٹہیفنگ نا ڈٹ انا پبی مخ تفی و اودے باسک ملک آتا نیام اٹ شونداری و زرگزرانی کمکاری ءِ مون آ دننگ، انفراسٹرکچر و شونداری ڈٹ آتیکن مالی وسیلہ غاتا فراوانی و علاقائی رابطہ و زرگزرانی ہم گرنچی کن اہم گوندا۔ وزیرخزانہ بینک انا ٹہیفنگ نا تکنیکی پلوآتا بابت پاکستان نا نقطہ نظر ءِ تالان کرسا اومیت ظاہرکرے سلاہ ئی بینک جدت، ڈیجیٹل فنانس، فن ٹیک سلوشنز و چاگڑد دوست مالیاتی وڑوڈول آتے تینا بنداوی سرجزآتا بشخ جوڑ کیک۔ وزیرخزانہ ایس سی او نیٹ ورک آف فنانشل تھنک ٹینکس نا فعالیت نا سلاہ نا ہم خیرمقدم ءِ کرے و اومیت ظاہر کرے کہ دا مالیاتی کمکاری نا پڑاٹ پٹ وپول، جاچ کاری و آخبت نا ڈٹ بندی کن گچین ءُ پلیٹ فارم اس جوڑمریک۔ وزیرخزانہ تینا تران اٹی پاکستان نا کنڈآن ایس سی او نا پلیٹ فارم نا کیرغ آن زرگزران نا کمکاری ءِ ودفنگ و ڈیہہ اٹی زرگزرانی شونہالی، سوگوی و پائیدار شونداری ءِ مون آ دننگ اٹ کمکاری و تین پہ تینی فائدہ غاتے مون آ تخنگ نا عزم انا دُوارہ پارے۔ وزیرخزانہ پاکستان اٹی نمان زرگزرانی سوگوی نا دوئی کننگ و پائیدار و جوان زرگزرانی شونداری نا سوگو بنداو ءِ تخنگ کن چندی بشخ آتیٹی کروک آ اصلاحات خاص وڑاٹ مالی نظم وضبط، اہم زرگزرانی ٹک آتیٹی گچینی، کرنٹ اکاؤنٹ نسخان اٹی کمتی، کرنسی نا قدر اٹی سوگوی و زرکارآتا پت اٹی ودکی ودنگ نا ہم ذکر ءِ کرے۔ داکان مست دیوان آن تران کرسا چین نا وزیرخزانہ و گورنرپیپلز بینک آف چائنا پاکستان نا زرگزرانی شونداری نا ستاءِ کرے و ملک اٹی زرگزرانی سوگوی نا سرسہب دوئی کننگ و اصلاحاتی ایجنڈا ءِ مون آ دننگ کن حکومت ءِ پاکستان ءِ مبارکبادی پیش کرے۔