بنجائی وزیر پیٹرولیم علی پرویز ملک نا جمہوریہ آذربائیجان نا اسٹیٹ آئل کمپنی نا صدر روشان نجف تون اوڑدہی

باکو۔ 03جون (اے پی پی) بنجائی وزیر پیٹرولیم علی پرویز ملک جمہوریہ آذربائیجان نا اسٹیٹ آئل کمپنی (ساکار) نا صدر روشان نجف تون اوڑدہی کرے، اوڑدہی ٹی ہڑتوم آملک آتا نیام اٹ توانائی نا بشخ اٹی کمکاری ءِ ودفنگ و تیل وگیس انا بشخ اٹی پوسکن شریداری نا گمان تیا گپ وتران کننگا۔ ترجمان پیٹرولیم ڈویژن نا کنڈآن جاری اعلامیہ نا رداٹ اوڑدہی ٹی پاکستان و آذربائیجان نا نیا م اٹ توانائی نا بشخ اٹی تعلقداری تے سوگو کننگ آ چکار کننگا۔ ہڑتوم آ فریق آک تین پہ تینی است خواہی نا امور، گمانی زرکاری و اسیجائی ڈٹ آتا بابت گپ وتران کریر تانکہ توانائی نا رکھ و پائیدار شونداری ءِ مون آ دننگ مرے۔ وزیرعلی پرویز ملک ساکار کون آ جہانی توانائی ادارہ غاتون سوگو شریداری ءِ مون آ دننگ کن پاکستان نا عزم انا درشانی ءِ کرے و زرکاردوست چاگڑد فراوان کننگ نا حکومت نا کوشست آتا بابت معلومدار کرے۔ اوپارے کہ ساکار کون آ جہانی شریدار آتون کمکاری آن پاکستان نا توانائی نا بشخ اٹی شونداری نا پوسکن ءُ کسر ملنگک۔ ساکار نا صدر روشان نجف پاکستان نا توانائی نا بشخ اٹی پیش رفت نا ستاءِ کرسا پاکستان تون کمکاری ءِ پین ودفنگ اٹ است خواہی نا درشانی ءِ کرے۔