بھارتی جارحیت ڈیہہ ءِ بے رکھ کرے، امن نا کسر بیرہ گپ وتران و سفارتکاری اٹ ممکن ءِ، بلاول بھٹو زرداری

نیویارک۔ 03جون (اے پی پی) پاکستان پیپلزپارٹی نا چیئرمین و سفارتی پارلیمانی ڈل انا سروک بلاول بھٹو زرداری جوان مذاکرات، سندھ طاس معاہدہ نا بحالی و کشمیر نا ویل انا ایسری آ زور شاغسا پارینے کہ امن نا کسر بیرہ گپ وتران و سفارتکاری اٹ ممکن ءِ۔ سے شنبے نادے آ پی پی پی میڈیا سیل انا کنڈآن جاری بیان نا رداٹ پاکستان نا سفارتی پارلیمانی ڈل انا سروک بلاول بھٹو زرداری نا اقوام متحدہ ٹی اوآئی سی باسک ملک آتے سویلی ایشیاٹی بھارت نا جارحیت و بے بنداو دوبہ غاتا بابت سرجمی اٹ حوال تس۔ پاکستانی سفارتی ڈل انا سروک بلاول بھٹو زرداری بھارت نا کنڈآن پہلگام جلہو ءِ بیدس جاست وپاست آن پاکستان تون گنڈنگ نا کوشست ءِ مستردکرے۔ پارلیمانی ڈل سندھ طاس معاہدہ نا اسہ کنڈی معطلی ءِ دِیر ءِ سلہہ جوڑ کننگ نا کوشست و جہانی کانود نا بھلا خلاف ورزی گوندا۔ اوکان پد چیئرمین بلاول بھٹو زرداری اقوام متحدہ ٹی اوآئی سی ملک آتا دیوان آن تران کرساپارے کہ بھارتی جارحیت ڈیہہ ءِ بے رکھ کرینے، دنیا ءِ دا خطرناک رجحان ءِ معمول مننگ آن توروئی مریک، بھارت دروغ دوبہ غاتے سیم آن ایپار جلہو نا جواز جوڑ کرے۔ اوپاکستان نا کنڈآن ڈیہہ اٹی بے چیٹی ءِ کم کننگ، ثالثی و جنگ بندی کن کڑد ادا کننگ آ او آئی سی نا منت واری ءِ ہرفے۔ بلاول بھٹو پارے کہ او آئی سی دانازرک وخت اٹی دنیا نا اخلاقی ضمیر جوڑ مرسا مون آ بسنے، کشمیر نا ویل انا انصاف اٹ ایسری کن مخ تفی ءِ برجاتخنگے۔ اوآئی سی ملک آک پاکستان نا کنڈآن تروک آ شفاف حوال نا ستاءِ کرسا یکجہتی نا درشانی ءِ کریر و اقوام متحدہ نا چارٹر و معاہدہ غاتا شرف آ زور شاغار۔