سائبر کرائمز نا توننگ کن پوسکن آ ٹیکنالوجی، سافٹ ویئر و ہارڈ ویئر نا گچین کاریم اٹ اتنگ المی ءِ، بنجائی وزیر داخلہ محسن نقوی

اسلام آباد۔ 03جون (اے پی پی) بنجائی وزیر داخلہ محسن نقوی پارینے کہ ساڑی آ پوسکن آ دور انا خواست آتے مون  آ تخسا نیشنل سائبر کرائمز انوسٹی گیشن ایجنسی (این سی سی آئی اے)ءِ جوڑ کننگانے، سائبر کرائمز نا توننگ کن پوسکن آ ٹیکنالوجی، سافٹ ویئر و ہارڈ ویئر نا گچین کاریم اٹ اتنگ المی ءِ۔ سے شنبے نادے آ نیشنل سائبر کرائمز انوسٹی گیشن ایجنسی نا ہیڈ کوارٹر نا دورہ نا وخت آ گپ وتران کرسا بنجائی وزیر داخلہ محسن نقوی ایجنسی نا ہیلپ لائن سینٹر نا بناءِ کرے و عملہ تون اوڑدہی کرسا جدت پسندی نا ستاءِ کرے۔ وزیرداخلہ محسن نقوی ہیلپ لائن سینٹر، فرانزک لیب، نیٹ ورک سیکورٹی ڈیپارٹمنٹ تون اوار چندی سیکشن تا دورہ ءِ کرے۔ داوخت آ وزیرداخلہ پارے کہ این سی سی آئی اے نا ہیلپ لائن پورو فعال ءِ، شاریک سائبرکرائم نا بابت غاوآ 1799آ کال کننگ کیرہ۔ وزیرداخلہ محسن نقوی تعلقدار آفیسر آتے سائبر کرائمز نا بابت غاوتا زوت چٹفنگ نا پارت کرساپارے کہ آرٹیفیشل انٹیلی جنس نا دور اٹی این سی سی آئی اے کون آ ادارہ غاتا گرج مہالو آن بھاز زیات ودانے۔ محسن نقوی پارے کہ ساڑی آ پوسکن آ دور انا خواست آتے مون آتخسا این سی سی آئی اے ءِ جوڑ کننگانے، سائبرکرائمز نا توننگ کن پوسکن آ ٹیکنالوجی، سافٹ ویئر و ہارڈ ویئر نا گچین کاریم اٹ اتنگ المی ءِ، بلاشبہ دااسہ پوسکن ءُ ادارہ اسے ، دے و نن خواری کرسا دا ایجنسی ءِ گچین انگا جوڑ کننگ ءِ، ادارہ کن نئے بیرہ باصلاحیت عملہ نا خذمت آتے دوئی کروئی مریک بلکن اوفتے غٹ المی آسراتی تے ہم تروئی مریک۔ وزیرداخلہ این سی سی آئی اے ہیڈ کوارٹرنا ماڑی نا اپ گریڈیشن نا پلان بٹنگانے و سٹاف نا کمتی ءِ پورو کننگ کن دمدستی گام گیج آتا پارت کرے۔ وزیرداخلہ این سی سی آئی اے نا پوسکن آ لوگو و بیرک نا منظوری ءِ ہم تس۔ اواین سی سی آئی اے نا رداٹ نیشنل سائبر اسکاؤٹس پروگرام ءِ دُوارہ بحال کننگ نا ہم منظوری ءِ تس وپارے کہ داپروگرام نا رداٹ اسکول و کالج آتاخوانوک آ مار و مسن تے سائبر کرائمز نا بابت آگاہی و تربیت فراوان کننگک۔ ڈائریکٹر جنرل این سی سی آئی اے وقارالدین سید ادارہ نا امور آ بنجائی وزیر داخلہ ءِ حوال تس۔ داوخت آ وزیرمملکت داخلہ طلال چوہدری ، سیکرٹری داخلہ خرم آغا و ایلوآفیسر آک ہم ساڑی ئسر۔