وزیراعظم نا کماشی ٹی دیوان، دیامربھاشاڈیم کون آ ڈٹ آتے اولیتی بنداو تیا پورو کننگ نا پارت

اسلام آباد۔ 03جون (اے پی پی) وزیراعظم محمد شہباز شریف پارینے کہ دِیر کوڑی کننگ نا وس ءِ ودفنگ، کشت وکشار کن درکار دِیر انا فراوانی و نوکاپ نا توننگ کن پوسکن ءُ ڈیم تفنگ المی ءِ، توانائی نا پیدوار و دِیر انا وافر کوڑی کننگ نا گچین نظام اس جوڑ کننگ کن دیامربھاشا ڈیم کون آ ڈٹ آتے اولیتی بنداو تیا پورو کننگے۔ سے شنبے نادے آ وزیراعظم میڈیا آفس آن جاری بیان نا رداٹ وزیراعظم محمد شہباز شریف نا کماشی ٹی دیامیر بھاشاڈیم و ایلو آبی وسیلہ غاتا امور آ اہم دیوان اس مس۔ دیوان اٹی بنجائی وزیر ڈٹ بندی احسن اقبال، بنجائی وزیر امور کشمیر و گلگت بلتستان انجینئر امیر مقام، بنجائی وزیر کانود و انصاف اعظم نذیر تارڑ ، بنجائی وزیر آبی وسیلہ معین وٹو، وزیراعظم نا سلاہکار سیاسی امور و بین الصوبائی رابطہ رانا ثناء اللہ ، وزیراعلیٰ گلگت بلتستان گلبرخان و تعلقدار بڑزکو سرکاری آفیسر آک بشخ ہلکر۔ وزیراعظم پارے کہ دِیر کوڑی کننگ نا وس ءِ ودفنگ، کشت وکشار کن درکار دِیر انا فراوانی، نوکاپ نا توننگ کن پوسکن ءُ ڈیم تفنگ المی ءِ، ننا زرگزرانی خودانحصاری نا دارومدار اڑزان بجلی و کشت و کشار آٹی ءِ، ہراڑکن دِیر انا سٹوریج ءِ ودفنگ و دِیر انا گچین کاریم اٹ اتنگ نا گرج ءِ۔ وزیراعظم پارت کرے کہ ملک اٹی توانائی نا پیدوار و دِیر انا وافر کوڑی نا گچین ءُ نظام اس جوڑ کننگ کن دیامربھاشاڈیم کون آ ڈٹ آتے اولیتی بنداو تیا پورو کننگے و دیامیر بھاشا ڈیم انا تفنگ اٹ بروک غٹ تر اڑاند آتے دمدستی وڑاٹ ایسر کننگ تون اوار اوار ڈٹ انا زوت آن زوت پوروی ءِ پک کننگے ۔