اسلام آباد۔2جون (اے پی پی): مزن وزیر ءِ پنت ءُشون ءِ رد ءَ یک مزنیں تک ءِ کثیر پارٹی ڈل 2جون ءَ چہ نیویارک، واشنگٹن ڈی سی، لندن ءُ برسلز ءِ تر ءُ تاب ءَ کنت۔ دوشمبے ءِ روچ ءَ درئی کارانی کارگس ءِ جارچین ءِ نیمگ ءَ جاڑی بوتگیں بیان ءِ رد ءَ اے 9باسکی ڈل ءِ سروکی ءَ پاکستان پیپلز پارٹی ءِ چیئرمین ءُ پیسریگیں دری کارانی وزیر بلاول بھٹو زرداری کنگ ءَ اِنت۔ ڈل ءِ دگہ باسک آنی تہ ءَ موسمیاتی بدلی ءُ چاگردی ھمگرنچی ءِ وزیر ڈاکٹر مصدق مسعود ملک، موسمیاتی بدلی ءُ چاگردی ھمگرنچی ءِ ھوالگ ءَ سینیٹ ءِ قائمہ کمیٹی ءِ چیئرپرسن ءُ اطلاعات ءُ موسمیاتی بدلی ءِ پیسریگیں وزیر سینیٹر شیری رحمان، راجی اسمبلی ءِ قائمہ کمیٹی ءِ چیئرپرسن ءُ راجی اسمبلی ءِ چیئرپرسن ھوار اَنت۔ وزیر حنا ربانی خار، پیسریگیں وزیر تجارت، دفاع ءُ دری کارانی انجینئر خرم دستگیر خان، پیسریگیں وزیر ءِ میری ٹائم امور سینیٹر سید فیصل علی سبزواری ءُ سینیٹر بشرہ انجم بٹ۔ اے ڈل ءِ تہ ءَ دو پیسریگیں دری کارانی سیکرٹری جلیل عباس جیلانی کہ آئی ءَ دری کارانی نگہبانی وزیر ءِ بستار ءَ ھم کار کتگ ءُ تہمینہ جانجوا ھوار اَنت۔ دومی ڈل ءِ سروکی ءَ مزن وزیر ءِ ھاسیں کمکار سید طارق فاطمی 2 جون ءَ چہ ماسکو ءِ تر ءُ تاب ءَ کنت۔اے ڈل آنی تر ءُ تاب ءِ مول ءُ مراد ایش انت کہ انوگیں بھارتی زوراکی ءِ بابت ءَ پاکستان ءِ چمشانک پیش کنگ بہ بیت۔ اے ڈل بھارت ءِ بے پرواہ ءُ جارحانہ کارروائی آنی پد ءَ پاکستان ءِ ذمہ واریں موقف ءَ را پدر کن اَنت ایشی ءِ تہ ءَ میاں اوستمانی کانود ءِ ھلاپ ورزی ھوار اِنت ءُ اے گپ ءَ را پدر کن اَنت کہ جیڑھ ءُ دیم پہ دیم ءِ سر ءَ گپ ءُ تران ءُ سفارتکاری ءَ را اولیت دیگ بہ بیت۔ بیان ءِ رد ءَ ڈل جنوبی ایشیا ءَ مھکمیں امن ءِ دیمروئی ءِ واستہ میاں اوستمانی براتی ءِ سرجمیں کرد ءَ پیلو کنگ ءِ ضلورت ءِ سر ءَ زور پر دیان انت۔ سندھ ءِ آپانی معاہدے ءِ نارمل کارکردگی ءِ ترندیں رنگ ءَ بندات کنگ ءِ ضلورت ھم ڈل آنی دیمروئی ءِ یک کلیدی سرھال ءِ بیت۔ اے ڈل گوں میاں اوستمانی گلانی سروکی، سرکاری کارگس ءِ واھند، مزنیں اگدہ دار، پارلیمنٹرین، تھنک ٹینک ءُ رسانکدر ءُ ھمے رنگ ءَ دگہ نامداریں مردماں ھم گند ءُ نند کن اَنت۔
