بروک آ مالی سال انا شونداری بجٹ 1000ارب روپئی ولے بیرہ بے کچ اہم و قومی فائدہ غاتا حامل ڈٹ آتے اوار کننگانے، بنجائی وزیر احسن اقبال

اسلام آباد۔ 02جون (اے پی پی) بنجائی وزیر ڈٹ بندی، شونداری و اصلاحات پروفیسر احسن اقبال پارینے کہ بروک آ مالی سال انا شونداری بجٹ 1000ارب روپئی وخت اس کہ جی ڈی پی شرح نمو نا ہدف 4.2 درسد، کشاری بشخ اکن 4.5درسد، صنعتی بشخ 4.3 درسد و خذمت آتا بشخ اکن شرح نمو نا ہدف 4 درسد مقرر کننگانے ولے کچ اٹنگا وسیلہ غاتا سوب بیرہ بے کچ اہم و قومی فائدہ غاتا حامل ڈٹ آتے اوار کننگانے۔ دوشنبے نادے آ سالانہ پلان کوآرڈینیشن کمیٹی نا دیوان اڈ ہلک۔ دیوان اٹی بنجائی وزیر خالد مقبول، بنجائی سیکرٹریز، سٹیٹ بینک، صوبائی حکومت آتا نمائندگان، اہم قومی و صوبائی ادارہ غاتا سروک و ایلو بڑزکو کمامدارآک بشخ ہلکر۔ چیف اکانومسٹ ڈاکٹر امتیاز دیوان اٹی بشخ ہلوک آتے سالانہ شونداری ڈٹ، زرگزرانی شونداری نا روڈ میپ و قومی اولیت آتیا سرجمی اٹ حوال تس۔ بنجائی وزیر احسن اقبال دیوان آن تران کرساپارے کہ پاکستان ءِ مون تروک زرگزرانی چیلنج آتا سوب شونداری بجٹ اٹی پدریسہ کمتی مون تروک ءِ ہرا قومی شونداری و السی آسودہی نا ہدف آتا دوئی کننگ اٹ سنجیدہ اڑاند اسے۔ ننے ودوک آ آبادی نا رداٹ شونداری فنڈ آتے ودفوئی مریک۔ اوپارے کہ بروک آمالی سال انا شونداری بجٹ 1000 ارب روپئی مقرر کننگانے۔ ولے کچ اٹنگا وسیلہ غاتا سوب بیرہ بے کچ اہم و قومی فائدہ غاتا حامل ڈٹ آتے اوار کننگانے۔ بنجائی وزیر داہیت آ زور شاغا کہ حکومت پیشن نا ادائیگی، کٹیا ٹی ودکی و شونداری خڑچ آتیٹی توازن کن جوان گام گیج کننگ ءِ۔ اوپارے کہ ’’اڑان پاکستان‘‘ پروگرام نا رداٹ قومی شونداری بجٹ اٹ ودکی و شفافیت ءِ مون آ دننگ کن ورکشاپس و اصلاحاتی گام گیج کننگ انگ ءِ، تھرڈ پارٹی ویلیڈیشن نا نظام درستی راستی کرفنگانے تانکہ شونداری ڈٹ آتیٹی شفافیت و کارکڑد ءِ پک کننگ مرے۔ احسن اقبال قومی اولیتی ڈٹ آتا فہرست اٹی دیامیر بھاشا ڈیم ، سکھر۔ حیدرآباد موٹروے ، چمن روڈ، قراقرم ہائی وے (فیزٹو) و بڑزکو تعلیم نا ڈٹ آتے سرفہرست گوندا۔ اوپارے کہ پاکستان نا شمار دنیا نا کم انگا خراج ریونیو والا ملک آتیٹی مریک و خراج دُزی نا مون ءِ توننگ و خراج نیٹ ءِ ودفنگ کن اسہ قومی مہم اسے نا سخت گرج ءِ۔ بنجائی وزیر پیدوار کرے کہ 2018ء ٹی نن پوسکن آ ڈٹ آتا بناء آ سجفینہ وخت اس کہ اینو ننے برجاڈٹ آتے محدود کننگ کون آ مشکل فیصلہ کروئی تمنگ ءِ۔ قومی شونداری کن ہربندغ و ادارہ ءِ تینا زمواری تے پورو کروئی مریک۔ اوداہیت انا ہم اعتراف ءِ کرے کہ اگہ اہم ءُ ڈٹ اس شونداری بجٹ اٹ اوار مننگ کتو تو اوڑآ پیشگی معذرت خواہ اُن، انتئے کہ 1000ارب روپئی نا بجٹ اٹی غٹ وزارت آتا گرج تے پورو کننگ ممکن الوکہ۔ احسن اقبال غٹ اسٹیک ہولڈر آتیا زور شاغا کہ او قومی مفاد اٹی فیصلہ کیر تانکہ پاکستان ءِ پائیدار شونداری نا کنڈآ دننگ مرے۔