اسلام آباد۔ 02جون (اے پی پی) وزیراعظم محمد شہباز شریف پارینے کہ معرکہ حق انا تاریخ ساز سرسہبی آن پد ملکی ادارہ غاتیٹی پائیدار اصلاحات نا کمک اٹ ملک ءِ اسہ سوگو ءُ جہانی زرگزران ا س جوڑ کننگ نا جہد اٹی سرسہب مننگ کن حکومت پاکستان سنبرینگوک ءِ۔ منسٹر آفس نا میڈیا ونگ آن جاری پریس ریلیز نا رداٹ وزیراعظم محمد شہباز شریف نا کماشی ٹی ایف بی آر نا امور نا بابت جاچ دیوان اس اڈہلک۔ وزیراعظم ایف بی آر اٹی برجا گام گیج و اصلاحات نا تھرڈ پارٹی ویلیڈیشن کن جہانی شہرت یافتہ کمپنی تا خذمت دوئی کننگ نا پارت کرساپارے کہ معرکہ حق انا تاریخ ساز سرسہبی آن پد ملکی ادارہ غاتیٹی پائیدار اصلاحات نا کمک اٹ پاکستان ءِ اسہ سوگو ءُ جہانی زرگزران اس جوڑ کننگ نا جہد اٹی سرسہب مننگ کن حکومت سنبرینگوک ءِ، غٹ بشخ آتیٹی ادارہ جاتی اصلاحات ترندی اٹ برجاءِ۔ وزیراعظم پارے کہ ملکی ادارہ غاتیان کرپشن نا انسداد و شفافیت نا مفننگ کون آ ایلو خامی تے مر کننگ کن حکومت ءِ پاکستان نا غٹ ادارہ غاک سخت خواری کننگ ءُ۔ ساڑی آمثبت زرگزرانی ٹک آک حکومتی پالیسی تا سہی کنڈآ ہِننگ نا شاہدی ءُ۔ وزیراعظم فیس لیس کسٹمز ایسسمنٹ سسٹم نا ساڑی کارکڑد آ است جمی نا درشانی ءِ کرسا پارے کہ شفافیت ءِ برقرارتخنگ کن اتوک آ فیس لیس کسٹمز اسیسمنٹ سسٹم کون آاصلاحات نا است بڈ نتیجہ مون آبننگ ءِ، پاکستان ءِ زرگزرانی وڑاٹ سوگو کننگ نا دا جہد اٹی نن سرسہب مرینہ۔ دیوان اٹی وزیراعظم ءِ فیس لیس کسٹمز اسیسمنٹ سسٹم نا ساڑی کارکڑد و پاکستان ریونیو آٹومیشن لمیٹڈ (پرال) اٹی اصلاحات نا پیش رفت نا بابت معلومدار کننگا۔ حوال اٹی پاننگاکہ فیس لیس کسٹمز اسیسمنٹ سسٹم نا نفاذ آن محصولات آتیٹی جم وڑاٹ ودکی مسنے و کسٹمز کلیئرنس نا دورانیہ ٹی خاطرخواہ کمتی بسنے، پاکستان ریونیو آٹومیشن لمیٹڈ اٹی اصلاحات نا عمل ترندی اٹ برجاءِ۔ حوال اٹی پاننگاکہ لس صارف آتیکن آسان ڈیجیٹل خراج ریٹرن نا نظام زوت نافذ العمل کننگک، لس صارف آتا آسراتی کن ڈیجیٹل خراج ریٹرن نا نظام ءِ اردو و ایلو ہندی بولی تیٹی درستی راستی کننگ نا عمل آ کاریم ترندی اٹ برجاءِ۔ دیوان اٹی بنجائی وزیر کانود و انصاف اعظم نذیر تارڑ، بنجائی وزیر حوالکاری و شینکاری عطاء اللہ تارڑ، چیئرمین ایف بی آر و تعلقدار ادارہ غاتا بڑزکوآفیسر آک ساڑی ئسر۔
