اسلام آباد۔ 02جون (اے پی پی) وزیراعظم نا پارت نا رداٹ اسہ بڑزکو کہولی کثیر الجماعتی ڈل 2 جون آن نیویارک ، واشنگٹن ڈی سی، لندن و برسلز نا دورہ ءِ کیک۔ دوشنبے نادے آ ترجمان دفترخارجہ نا کنڈآن جاری بیان نا رداٹ نہہ باسکی ڈل انا کماشی ءِ پاکستان پیپلزپارٹی نا چیئرمین و مسکوہی وزیرخارجہ بلاول بھٹو زرداری کننگ ءِ۔ ڈل انا ایلو باسک آتیٹی وزیرموسمیاتی بدلی و چاگڑدی رابطہ ڈاکٹر مصدق مسعود ملک، سینیٹ نا قائمہ کمیٹی موسمیاتی بدلی و چاگڑدی رابطہ نا چیئرپرسن و مسکوہی وزیرحوالکاری و موسمیاتی بدلی سینیٹر شیری رحمان، قومی اسمبلی نا قائمہ کمیٹی خارجہ امور نا چیئرپرسن و مسکوہی وزیر خارجہ حناربانی کھر، مسکوہی وزیر واپار، دفاع و خارجہ امور انجینئر خرم دستگیرخان، مسکوہی وزیر سمندری امور سینیٹر سید فیصل علی سبزواری و سینیٹر بشریٰ انجم بٹ ئسک اوار ءُ۔ ڈل اٹی اِرا مسکوہی خارجہ سیکرٹریز جلیل عباس جیلانی ہرا نگراں وزیرخارجہ نا وڑاٹ ہم خذمت سرتسنے و تہمینہ جنجوعہ ئسک ہم اوار ءُ۔ وزیراعظم نا خصوصی کمکار سید طارق فاطمی نا کماشی ٹی ارٹ میکو ڈل 2جون آن ماسکونا دورہ ءِ کیک۔ دا ڈل آتا دورہ غاتا مسخت ساڑی آ بھارتی جارحیت آ پاکستان نا نقطہ نظر ءِ پیش کننگ ءِ۔ دا ڈل آک بھارت نا کنڈآن جہانی کانود نا خلاف ورزی تون اوار لاپرواہی و جارحانہ گام گیج آتیان پد پاکستان نا زموارانہ موقف ءِ تالان کیرہ و داہیت ءِ مون آ تخرہ کہ مذاکرات و سفارت کاری ءِ جھیڑہ و تصادم آ بایدے اولیت تننگے۔ بیان نا رداٹ ڈل آک سویلی ایشیاٹی پائیدار امن نا مون آ دننگ کن جہانی برادری کن تینا پبی کڑد ادا کننگ نا گرج آ زور شاغرہ۔ سندھ طاس معاہدہ نا ہڑدے ئی کاریم ءِ دمدستی وڑاٹ دُوارہ بناکننگ نا گرج ءِ ہم ڈل آتا رسینگ نا اسہ اہم ءُ سرحال اس مریک۔ دا ڈل آک جہانی ادارہ غاتا سرکڑدہ، پبلک آفس ہولڈرز، بڑزکو کمامدار، پارلیمنٹ نا باسک ، تھنک ٹینکس و میڈیا تون اوار اوار ایلو پنی آ شخصیت آتون ہم اوڑدہی کیرہ۔
