اسلام آباد۔ 02جون (اے پی پی) پاکستان اٹی اسلامی کمکار تنظیم (اوآئی سی) نا وزارتی قائمہ کمیٹی سائنس و ٹیکنالوجی نا کنڈآن اسہ دے ئی جہانی سیمینار بعنوان ’’آبی تنکی و سندھ طاس معاہدہ‘‘ چارشنبے نادے آمریک۔ کامسٹیک آن جاری بیان نا رداٹ کامسٹیک سیکرٹریٹ اسلام آباد اٹی دا سیمینار کامسٹیک نا شریداری اٹ کراچی کونسل آن فارن ریلیشنز، حصار فاؤنڈیشن و پنجوانی۔حصار واٹرٹرانسپورٹ نا کمک اٹ اڈتننگ انگ ءِ۔ سیمینار اٹی دِیر، چاگڑدی کانود و قومی سلامتی نا چاہندار، چندی ملک آتا سفیرآک، انڈس واٹر کمیشن نا سینئر کمامدار و پالیسی ساز شخصیت آک بشخ ہلیرہ تانکہ بھارت نا کنڈآن سندھ طاس معاہدہ کننگا اسہ کنڈی معطلی آن پد ودی مروک آ حالیت و اونا پاکستان آ گمانی سٹریٹجک گام گیج آتا جاچ ءِ ہلنگ مرے۔ سیمینار اٹی بشخ ہلوک آ شخصیت آتیٹی چیئرپرسن کراچی کونسل آن فارن ریلیشنز نادرہ پنجوانی، سینیٹر مشاہد حسین سید، ءِ آرڈینیٹر جنرل کامسٹیک پروفیسر ڈاکٹر محمد اقبال چوہدری، چیئرپرسن حصار فاؤنڈیشن و شریک بانی پنجوانی۔ حصار واٹرانسٹیٹیوٹ سیمی کمال، پنی آ قومی سلامتی جاچکار اکرام سہگل، چاہندار جہانی چاگڑدی مالیت علی توقیر شیخ، چاہندار چاگڑدی کانود رافع عالم، باسک بورڈ آف گورنرز حصار فاؤنڈیشن زوہیر عاشر اوار ءُ۔ بیان نا رداٹ سیمینار نئے بیرہ ساڑی آتنکی نا جاچ ءِ ہلنگ کن اڈتننگ انگ ءِ بلکن دانا بنداوی مسخت اسہ گچین، سائنسی و سفارتی حکمت عملی نا ٹہیفنگ ءِ تانکہ پاکستان دِیر انا شریداری و چاگڑدی رکھ انا رداٹ علاقائی و جہانی کمکاری نا پوسکن آ گمان تیان پبی فائدہ ہرفنگ کے۔ داپروگرام کامسٹیک نا ہمو مریس مدی وژن نا چرجوئی ءِ ہرانا رداٹ سائنس، ٹیکنالوجی و پالیسی سازی ءِ یکجا کرسا چاگڑدی بدلی و سیکورٹی نا چیلنج آتون مون تننگ کن پاکستان نا آبی پالیسی ءِ دیرپابنداوتیا سوگو کننگ انگ ءِ۔
