اسلام آباد۔ 02جون (اے پی پی) پاکستان بھارتی راہشون و بھارتی وزارت خارجہ نا ترجمان نا تازہ انگا بیان تیا سخت ردعمل نا درشانی ءِ کرسا پارینے کہ بھارت دھڑکو ، غلط بیانی یا طاقت نا کمک اٹ تینا مسخت آتے دوئی کننگ کپک، پاکستان امن و تعمیری مصروفیات آتیکن سنبرینگوک ءِ ولے او ہرجارحیت نا برخلاف تینا وتواجہی و علاقائی سالمیت نا دفاع کن اسہ وڑاٹ سنبرینگوک ءِ۔ دفترخارجہ نا ترجمان دوشنبے نادے آ داڑے جاری بیان اٹی بھارتی راہشون تا پاکستان مخالفانہ بیان و 29مئی آ بھارتی وزارت خارجہ نا ترجمان نا ریمارکس نا بارواٹی حوالکار آتا سوج آتا ورندی ءِ ترساپارے کہ بھارتی سرکڑدہ غاتا ساڑی آ ریمارکس بشمول بہار اٹی تروک آ ریمارکس اسہ بھلو فریشان کن ذہنیت اسے نا عکاسی ءِ کیک ہراامن آ دشمنی ءِ اولیت ایتک ۔ اوپارے کہ پاکستان ءِ علاقائی نزوری نا منبع نا وڑاٹ پیش کننگ نا ہرکوشست حقیقت آن اسہ کنڈ ءِ۔ ترجمان پارے کہ جہانی برادری بھارت نا جارحانہ رویہ نا ریکارڈ آن جوانی اٹ بلد ءِ ہراٹی پاکستان نا تہہ ٹی دہشت گردی نا کارروائی تا دستاویزی مخ تفی ہم اوار ءِ، دا راستی تے خورک بیانیہ یا متنفر چم آتے اٹ اودیم کننگ کپک، جموں وکشمیر نا جھیڑہ ڈیہہ اٹی امن و سوگوی ءِ خطرہ جوڑ کروک بنداوی ویل ءِ، پاکستان اقوام متحدہ نا سلامتی کونسل نا تعلقدار قرارداد و کشمیری الس نا است خواہی تا رداٹ کشمیر نا جھیڑہ نا انصاف اٹ و دیرپا ایسری نا وکالت اٹی ثابت گام سلک، دا بنداوی ویل ءِ پدپشت تخنگ ڈیہہ ءِ پدریسہ بے پتی و ممکنہ تصادم اٹ شاغنگ نا مترادف ءِ۔ ترجمان پارے کہ ساڑی آ ہفتہ غاتا پیش رفت اسہ وار ولدا جہالت و جور ءِ پیدوار کرینے، بھارت دھڑکو، غلط بیانی یا طاقت نا کمک اٹ تینا مسخت آتے دوئی کننگ کپک و نئے کیک۔ اوپارے کہ پاکستان امن و تعمیری مصروفیات آتیکن سنبرینگوک ءِ ولے او ہرجارحیت نا برخلاف تینا وتواجہی و علاقائی سالمیت نا دفاع کن اسہ وڑاٹ سنبرینگوک ءِ۔ ترجمان پارے کہ علاقائی ہم گرنچی نا قیمت آ تنگ سیاسی فائدہ غاتا دوئی کننگ نا جاگہ غا سویلی ایشیاٹی پائیدار امن پختگی، سگ و جھیڑہ غاتا بنداوی سوب آتے ایسر کننگ کن آمادگی نا خواست کیک۔
