سیالکوٹ۔ 02 جون (اے پی پی) وزیردفاع خواجہ محمد آصف پارینے کہ پنجاب اسمبلی نا حلقہ پی پی 52 سیالکوٹ IXنا ضمنی گچین کاری تیٹی پاکستان مسلم لیگ (ن) نا اومیتدار حناارشد نا کٹنگ دا مچ آ ٹیم انا کٹنگ ءِ ہرا وزیراعلیٰ پنجاب مریم نواز شریف و پنجاب حکومت نا سرکڑدہ ئی ٹی اُرااُراغا وونٹ خواہسا کرے ہراڑآ داغٹ مخلوق مبارکباد نا حقدار ءُ۔ داخیال آتا درشانی ءِ او (ن) لیگی اومیتدار حنا ارشد نا ہنکین آ ہنسا ہموڑے ساڑی (ن) لیگی کارندہ غاتیان تران کرسا کرے۔ اوپارے کہ ای سیالکوٹ، نارووال ، گوجرانوالہ ، گجرات و لاہور تون اوار مچ آ پنجاب آن دانگیا برسا دا حلقہ نا گچین کاری مہم اٹی بشخ ہلوک آ غٹ السی نمائندہ و عہدیدار آتا منت واری ءِ ہرفیوہ کہ ہرافتا خواری رنگ ایس و ننا مسڑ حنا ارشد ءِ اللہ تعالیٰ سرسہبی تس۔ اوپارے کہ دا مچ آ ٹیم انا سرسہبی ءِ ہرا اُرااُراغا ہنسا وونٹ خوائسر و ولدا الس ہراوڑ رسپانس تس ستاکڑزک۔ اوپارے کہ حکومت پنجاب ہراوڑاٹ دا ضمنی گچین کاری نا مہم ءِ چلیفے و چندی السی نمائندہ و عہدیدارآک خواری کرینو اگہ ہنداوڑ نن گچین کاری تیٹی بشخ ہلسا کرین تو دنیا نا اسہ طاقت اس ہم پاکستان مسلم لیگ (ن) ءِ کٹنگ کپک۔ وزیردفاع نا پاننگ ئس کہ پی پی 52سیالکوٹ IXنا ضمنی گچین کاری تیٹی سرسہبی نا سہرا وزیراعلیٰ پنجاب مریم نواز شریف ءِ کاہک ہرا پکاعزم اتون دا حلقہ نا گچین کاری مہم ءِ چلیفے و سرسہبی دوئی کرے۔ اوپارے کہ دا اللہ تعالیٰ ننے آ بھاز بھلو کرم نوازی و مہربانی اس کرینے و ای حناارشد نا سیاسی زند انا سرسہبی کن دعاکیوہ کہ اللہ تعالیٰ ننا دا مسڑ ءِ پین زیات عطاکے۔
